Խստորեն դատապարտում եմ հայ լինելուս համար խորհրդարանում իմ նկատմամբ ստոր հարձակումներն ու ռասիստական հայտարարությունները։ Սոցկայքերում նման տողեր է գրել Թուրքիայի քրդական «Ժողովուրդների դեմոկրատական» կուսակցության պատգամավոր Կարո Փայլանը։
«Ֆիզիկական բռնությանը զուգահեռ իմ հայ ինքնությանն ուղղված վիրավորական խոսքեր են ասել «Արդարություն եւ զարգացում» կուսակցության պատգամավորները։ Չմոռանանք, որ ֆաշիստները վախկոտ են, նրանք միայն խմբով միայնակի վրա կարող են հարձակվել»,-գրել է Կարո Փայլանը։
Նշենք, որ Թուրքիայի խորհրդարանում քրդերին պատգամավորական անձեռնմխելությունից զրկելու օրինագծի քննարկումների ժամանակ իշխող կուսակցության պատգամավորները 3 օր շարունակ հարձակվել են քուրդ պատգամավորների վրա։ Իսկ մայիսի 3-ին իշխող կուսակցության անդամների գլխավոր թիրախը եղել է Կարո Փայլանը։
