Օնտարիոյում Հայոց ցեղասպանության զոհերին նվիրված հուշարձան է կանգնեցվում՝ ի հիշատակ կորսված կյանքերի: Այս մասին ապրիլի 30-ին Օնտարիո նահանգի Սենթ Կատարինս քաղաքում հուշարձանի բացման առիթով հայտարարել է Կանադայի վարչապետ Ժյուստեն Տրյուդոն:
Ըստ Horizonweekly-ի, կանադական վարչապետի ուղերձում ասվում է.
«Կանադայի ե՛ւ Սենատը, ե՛ւ Համայնքների պալատը բանաձեւեր են ընդունել, որոնցում այդ իրադարձությունները ցեղասպանություն են կոչվում:
Այս հուշարձանը թույլ կտա պահպանել նրանց մասին հիշողությունը, ովքեր իրենց կյանքն են զոհել, եւ նրանց, ովքեր տուժել են ցեղասպանության ժամանակ, ինչպես նաեւ խորը հարգանք հայտնել նրանց ժառանգներին, այդ թվում՝ նրանց, ովքեր հիմա Կանադան իրենց տունն են կոչում:
Ցանկացած ծագում եւ հավատք ունեցող կանադացիները միասնական են բազմակարծության, մարդու իրավունքների արժեքներին հավատարմության հարցում:
Խնդրում եմ, միացե՛ք ինձ՝ խաղաղ ապագայի հույսով՝ հիմնված հանդուրժողականության, հարգանքի եւ հաշտեցման վրա»: