Միգրացիայի միջազգային կազմակերպությունը (IOM) հաղորդել է անցած հանգստյան օրերին Միջերկրական ծովում մեծ թվով փախստականների զոհվելու մասին:
IOM-ի տվյալներով, ապրիլի 30-ին եւ մայիսի 1-ին առնվազն 113 մարդ է զոհվել Լիբիայից Իտալիա հասնելու փորձի ժամանակ: Ընդհանուր առմամբ, միգրանտների փոխադրող նավակների խորտակման չորս միջադեպ է արձանագրվել:
Դեպքերից մեկի ընթացքում իտալական առեւտրային նավը կարողացել է օգնության հասնել եւ 26 կյանք փրկել, սակայն 84 մարդ զոհվել է: Եվս 29 մարդ խորտակվել է ռետինե նավակով Թունիսի նեղուցն անցնելու փորձի ժամանակ: Խորտակված չորրորդ նավի մասին առայժմ տեղեկություններ չկան:
Ըստ Lenta-ի, ծովային ճանապարհով Եվրոպա հասնելու փորձ կատարող միգրանտների մեծ մասն Արեւմտյան Աֆրիկայի երկրներից են: Նրանց թվում սիրիացիներ, աֆղանցիներ եւ իրաքցիներ գրեթե չկան, սակայն, իտալական իշխանությունների համոզմամբ, շուտով այն փախստականները, որոնք նախկինում Եվրամիության երկրներ էին հասնում Բալկանների տարածքով, կհասկանան, որ ծովային ուղուն այլընտրանք չկա:
Ընդհանուր առմամբ, տարեսկզբից Միջերկրական ծովում 1357 միգրանտներ եւ փախստականներ են զոհվել, 28.593 մարդ բարեհաջող Իտալիա է հասել, իսկ 154.862 միգրանտ ափ է դուրս եկել Հունաստանում:
