Եթե ԵԱՀԿ Մինսկի խմբի համանախագահ երկրները չկարողանան կամ չցանկանան կատարել Հայաստանի առաջադրած երեք նախապայմանները՝ բանակցությունների վերսկսման համար, Հայաստանն ու Լեռնային Ղարաբաղն ազատ կլինեն իրենց գործողություններում: Այս մասին NEWS.am-ի թղթակցի հետ զրույցում հայտարարեց Արտաքին քաղաքականության եւ անվտանգության հարցերով ԼՂՀ Հանրային խորհրդի նախագահ, ԼՂՀ ԱԳ նախարարի նախկին տեղակալ Մասիս Մայիլյանը՝ անդրադառնալով հարցին, որ ԵԱՀԿ ՄԽ համանախագահները ոչ մի հասցեական հայտարարություն չարեցին, ինչն էլ Ադրբեջանի ագրեսիայի շարունակման պատճառներից մեկը դարձավ:
Նրա խոսքով, հիմա ամենակարեւոր խնդիրը խաղաղության պահպանումն է: «Եվ մեր բոլոր ջանքերը պետք է դրան ուղղված լինեն: Հայտնի է, որ Հայաստանի իշխանությունները 3 պայման են առաջադրել: Եթե այդ նվազագույն պայմանները կատարվեն, կարծում եմ, որ հնարավոր կլինի երկխոսություն սկսել: Բայց այդ դեպքում ԼՂՀ-ն պետք է բանակցությունների լիարժեք կողմ դառնա»,- ընդգծեց Մասիս Մայիլյանը:
Նաեւ, ըստ նրա, նոր մոտեցումներ են անհրաժեշտ: «Այսինքն՝ ԵԱՀԿ Մինսկի խմբի համանախագահները պետք է նոր, ավելի իրատեսական առաջարկներով հանդես գան, քանի որ մենք տեսանք, որ նախորդ առաջարկներն Ադրբեջանի որոշակի հույսեր էին տալիս»,- փաստեց Մասիս Մայիլյանը: