Ռազմական ղեկավարությունից մի քանի պատասխանատուների պաշտոնանկ անելը հարցի լուծում չէ, քանի դեռ հստակ կոռուպցիայի դեմ պայքար չկա։ Այս մասին NEWS.am-ի հետ զրույցում ասաց Ազատամարտիկների դաշինքի խորհրդի անդամ Ռազմիկ Պետորսյանը, որն իր մարտական ընկերների հետ այս պահին գտնվում է առաջնագծում։
«Այնպես չի, որ միայն այն բնագավառներում էին թերացումները, որտեղ եղան պաշտոնանկություններ։ Ուրիշ խնդիր է, որ ընդհանուր վերաբերմունքը պետք է փոխվի, եթե կոռուպցիայի դեմ հստակ քայլ չանենք, մի քանի պաշտոնանկությունները խնդիր չեն կարող լուծել։ Կոռւպցիայի նկատմամաբ ընդհանուր վերաբերմունքը պիտի փոխվի»,-ասաց Ռազմիկ Պետրոսյանը։
Նա նշեց, որ մինչեւ առաջնագիծ մեկնելը, իրենք շատ լավ գիտեին ոլորտի խնդիրների մասին եւ հիմա առավել եւս պնդում են, որ զինվոր ու երկիր պահելու համար անհրաժեշտ է ուժեղ տնտեսություն։ Ոչ թե առաջնագծում պատերազմ, իսկ թիկունքում՝ թալան։
«Այնպես չէ, որ դիրքեր գալով իմացանք՝ ինչ խնդիրներ կան։ Հիմնական խնդիրը տնտեսության կառավարման,կոռուպցիայի հետ է կապված, որոնք առաջինը նկատվում են սահմանին։ Փառք ու պատիվ, որ այստեղ մեր զինուժը ունի մարտական ոգին, նվիրվածությունը, եւ էս հերոսական կեցվածքով են միայն փակվում էդ բացերը։ Իշխանությունը պետք է դեմքով շրջվի ժողովուրդը, հզոր տնտեսությամբ պիտի կարողանանք զինվորին ու երկրին տեր կանգնենք։ Մենք դատապարտված ենք հաղթելու, իսկ հաղթանակը չի կարող լինել, եթե պատերազմ լինի, իսկ թիկունքում՝ թալան։ Չի կարող լինել այնպես, որ զինվորը առաջնագծում հայրենիք պահի, իսկ թիկունքում մի քանի ոչնչություն թալանեն երկիրը»։
Տարածքներ զիջելու թեման ինչպես մայրաքաղաքում, այնպես էլ առաջնագծում թեժ է։ Ազատամարտիկների վերաբերմունքը նույնն է՝ ոչ մի թիզ հող թշնամուն։
«Որեւէ մեկը բացարձակապես իրավունք չունի խոսել հող զիջելու մասին։ Մի անգամ՝ 90-ականներին, պատերազմը նոր էր դադարել, ընկերներով քննարկում էինք էլի հողեր զիջելու հարցը, թե հնարավո՞ր է երբեւէ զիջենք տարածք, երջանկահիշատակ սպարապետն ասաց՝ ես չեմ զարմանում, որ նման հարց է ծագում ձեր մոտ, մենք էնքան ենք պարտվել ու լացել, սրան-նրան խնդրել, որ մեզ օգնեն, որ մի անգամ հաղթել ենք, խառնվել ենք իրար ու չգիտենք՝ ինչ անենք։ Հաղթանակից հետո պիտի կարողանանք արժեւորենք ու պահենք դա։ Ու իրականում էդպես է, ցավոք, չենք կարողացել դա անել, հողեր հանձնելու մասին խոսելը ստրկամտություն է։ Մինչեւ հիմա չհասկացանք՝ այդ տարածքները ինչի գնով ազատագրվեցին։ Որեւէ մեկը չպիտի իրավունք վերապահի իրեն այդ տարածքների ճակատագրի մասին բարձրաձայնել։ Դա մեզ նվեր չեն տվել»,-վրդովված ամփոփեց ազատամարտիկը։