Դպրոցահասակ ավելի քան 460 մլն երեխա ապրում է ռազմական հակամարտությունների կամ բնական եւ տարերային աղետների հետեւանքով առաջացած հումանիտար ճգնաժամում հայտնված երկրներում։ Այս մասին ասված է ՄԱԿ Մանկական հիմնադրամի (ՅՈՒՆԻՍԵՖ) զեկույցում։
«Դպրոցահասակ երեխաների մոտ մեկ քառորդը՝ 462 մլն երեխա, ապրում է հումանիտար աղետների մեջ հայտնված երկրներում»,- ասված է հիմնադրամի զեկույցում։ ՅՈՒՆԻՍԵՖ-ի տեղեկություններով՝ 3-18 տարեկան 75 մլն երեխա անհապաղ օգնության եւ կրթության կարիք ունի։ Ընդ որում, հումանիտար օգնության միայն 2 տոկոսն է բաժին ընկնում կրթական ծրագրերին։
ՅՈՒՆԻՍԵՖ-ի տեղեկություններով՝ ավելի քան 37 մլն երեխա դպրոց չի հաճախում, ընդ որում, ուսումնական հաստատությունների քանակը շարունակում է նվազել հակամարտությունների եւ տարերային աղետների պատճառով։ Հատկապես ծանր վիճակ է Սիրիայում, որտեղ հակամարտության 5 տարիների ընթացքում փակվել է ավելի քան 6 հազար դպրոց։
ՅՈՒՆԻՍԵՖ-ի զեկույցը հրապարակվել է Ստամբուլում առաջին Համաշխարհային հումանիտար գագաթնաժողովի մեկնարկից առաջ։ Ակնկալվում է, որ գագաթնաժողովում կհայտարարվի «Կրթությունը չի սպասում» գլոբալ հիմնադրամի ստեղծման մասին, որի նպատակը ճգնաժամային իրավիճակներում հայտնված երեխաներին կրթությամբ ապահովելն է։ ՅՈՒՆԻՍԵՖ-ը հույս ունի դրա համար մոտ 4 մլրդ դոլար հավաքել, որն առաջիկա 5 տարում կհատկացվի 13.6 մլն երեխայի, իսկ 2030-ին՝ 75 մլն երեխայի կրթության համար։