Ֆինլանդիայից տղան Facebook-ից տասը հազար դոլար պարգեւ է ստացել այն բանի համար, որ Instagram-ում բագ է հայտնաբերել, որը ցանկացած օգտատիրոջը հնարավորություն էր տալիս մեկնաբանություններ ջնջել, հայտնում է «ՌԻԱ Նովոստին»` վկայակոչելով The Guardian-ին:
Տղան իր մասին պատմել է ֆիննական Iltalehti թերթին: Նրա խոսքով, ինքն արդեն երկու տարի է` տարված է կոդ գրելով եւ տեսախաղերով: Նա ծրագրավորել է սովորում իր երկվորյակ եղբոր հետ: Բացի այդ, ապագայում կուզեր աշխատել տեղեկատվական անվտանգության ոլորտում:
Instagram-ում բագ հայտնաբերելով` նա նամակ է գրել Facebook-ի ադմինիստրացիային: «Ես կարող էի ջնջել ցանկացածի մեկնաբանությունները, օրինակ` Ջասթին Բիբերի», — ֆինն լրագրողներին բացատրել է նա իր հայտնաբերած խոցելիության էությունը:
10 տարեկան ֆիննի համադասարանցիներն ապշել են, երբ իմացել են պարգեւի մասին, գրում է Iltalehti-ն: Տղայի հորը եւս դա անակնկալի է բերել. նրա խոսքով, ինքը չէր մտածում, որ որդին իր հակման մեջ այդքան հեռուն կգնա:
Բրիտանական թերթի տվյալներով, նա ամենաերիտասարդ մարդն է, որին Facebook-ը պարգեւ է հանձնել խոցելիություն հայտնաբերելու համար: Ընկերությունը 2011-ից ի վեր պարգեւատրում է այն օգտատերերին, որոնք նման բնույթի բագեր են հայտնաբերում: