Գյումրիում մայիսի 3-ին մահվան ելքով դանակահարություն կատարելու կասկածանքով ձերբակալվել է Գյումրիի 23-ամյա բնակիչ Հովհաննես Պիճիկյանը:
Դեպքի տեղի է ունեցել Գյուրիի 8-րդ թաղամասի այն տարածքում, որտեղ հավաքվում են տաքսու վարորդները: Դանակահարված քաղաքացիները, որոնք մայիսի 3-ի երեկոյան տեղափոխվել են «Գյումրիի» բժշկական կենտրոն, տաքսու վարորդներ են, նրանց Հովհաննեսը դանակահարել է՝ «քեֆից» դուրս գալուց հետո, տեղի ունեցած վիճաբանության պատճառով:
NEWS.am-ին ՀՀ Քննչական կոմիտեի մամուլի ծառայությունից հայտնեցին, որ քրեական գործ է հարուցվել Քրեական օրենսգրքի 104-րդ հոդվածի 1-ին մասով (Սպանությունը՝ ապօրինաբար մեկ ուրիշին դիտավորությամբ կյանքից զրկելը, որը պատժվում է ազատազրկմամբ՝ 6-12 տարի ժամկետով) եւ 104-րդ հոդվածի 2-րդ մասով (Սպանությունը՝ անձի կամ նրա մերձավորի՝ կապված այդ անձի կողմից իր ծառայողական գործունեության կամ հասարակական պարտքի կատարման հետ, որը պատժվում է ազատազրկմամբ՝ 8-15 տարի ժամկետով, կամ ցմահ ազատազրկմամբ):
Ավելի վաղ NEWS.am-ը տեղեկացրել էր, որ «Գյումրի» բժշկական կենտրոն մայիսի 3-ին, կտրած-ծակած վերքերով երկու քաղաքացի է տեղափոխվել, որոնցից մեկը մահացել է: Գյումրի քաղաքի բնակիչ 50-ամյա Արթուր Չ.-ն, որ մոտ ախտորոշվել են լյարդի, երիկամի վնասվածքներ, ներքին արյունահոսություն, ժամը 21:30-ին մահացել է:
Դանակահարվածներից մյուսի՝ Գյումրիի 49-ամյա բնակիչ Աշոտ Է.-ի մոտ ախտորոշվել է որովայնի առաջնային պատի ծակած-կտրած թափանցող վերք, բարակ եւ հաստ աղիների վնասվածք, ներքին արյունահոսություն: Հիվանդին ցուցաբերվել է համապատասխան բժշկական օգնություն, առողջական վիճակը գնահատվում է միջին ծանրության: