Լոռու մարզի Արմանիսի ոսկու հանքի աշխատակիցներն այսօր` մայիսի 4-ին, բողոքի ցույց են իրականացրել՝ պահանջելով հանքը շահագործող «Սագամար» ՓԲԸ-ից վճարել ընթացիկ տարվա 4 ամսվա աշխատավարձի պարտքը, ինչպես նաեւ վերջնական պատասխան տալ՝ գործարանի ու իրենց ճակատագրի մասին:
Գործարանի բակում հավաքվել էր շուրջ 100 աշխատակից, մինչդեռ գործարանն աշխատավարձի պարտքեր ունի շուրջ 400 աշխատակցի:
Աշխատակիցների հետ հանդիպել է գործարանի պետ Սամվել Չոբանյանը, որը հայտնել է, որ այս պահին հնարավոր չէ աշխատակիցների աշխատավարձը փոխանցել, քանի որ գործարանի հաշվեհամարները կալանքի տակ են: Ըստ ֆաբրիկայի պետի՝ այս պահին ֆիննախի կողմից գործարանի հաշիվները կալանքի տակ դնելու որոշումը դատարանում վիճարկվում է:
Աշխատակիցներին հասած տեղեկություններով՝ ինչ-որ անձինք եկել, նկարել, չափ ու ձեւ են արել գործարանի գույքն ու հեռացել են, նրանք մտավախություն ունեն, որ գույքը կվաճառվի, իսկ իրենք այդպես էլ աշխատավարձ չեն ստանա:
Աշխատակիցները որոշում կայացրին սպասել մինչեւ կիրակի, որից հետո արդեն կսկսեն ճանապարհներ փակել այնքան ժամանակ, մինչեւ իրենց աշխատավարձի խնդիրը լուծվի: