ՌԴ-ի օդանավը Սիրիայում խոցելուց հետո պատժամիջոցների առաջ կանգնած թուրք ոսկերիչներն իրենց գործի միակ փրկությունը տեսնում են Հայաստան եւ Իրան տեղափոխվելով։
Թուրքական Habervaktim կայքի փոխանցմամբ՝ Ստամբուլի Փակ շուկայի (Քափալըշարշը) ոսկերիչների ամենօրյա խոսակցությունների թեման է ռուսական պատժամիջոցներից խուսափելու համար Իրան եւ Հայաստան տեղափոխվելը։
Նշվում է, որ ռուսական կողմը թուրքական ոսկիների համար սահմանել է 42 տոկոս մաքս եւ լրացուցիչ դժվարություններ, որն էլ ստիպել է թուրք ոսկերիչներին այլընտրանք փնտրել ռուսական շուկա մտնելու համար։
Թուրք ոսկերիչների մի մասն արդեն Իրան է մեկնել՝ տեղացիների հետ համատեղ ընկերություններ հիմնել, մի մասն էլ՝ հիմնականում ստամբուլահայեր, Հայաստան։ Նշվում է, որ Հայաստանի շուկան նախընտրած թուրք ոսկերիչները հաշվի են առել տեղի էժան աշխատուժն ու ՌԴ ու հետխորհրդային մյուս երկրներ ոսկի արտահանելու հեռանկարները։
Նշվում է, որ Ստամբուլի Փակ շուկայում արդեն որոշ ոսկու խանութներ փակվել են, որոնց սեփականատերերը, ըստ պնդումների տեղափոխվել են Հայաստան։
