2016 թվականի ապրիլի 1-ի լույս 2-ի գիշերը Ադրբեջանի կողմից զինադադարի ռեժիմի խախտման հետեւանքով մարդու իրավունքների ոտնահարումների կապակցությամբ Մարդու իրավունքների եվրոպական դատարան գանգատներ ներկայացրած իրավաբան-իրավապաշտպանների խումբը շարունակում է ադրբեջանական զինված ուժերի կողմից զինծառայողների, նրանց ընտանիքի անդամների եւ խաղաղ բնակչության իրավունքների պարբերական խախտումների վերաբերյալ նոր գանգատների նախապատրաստումը:
Նախաձեռնված իրավական ընթացակարգերն առանձնահատուկ են եւ բարդ, ունեն տեւական բնույթ, իսկ գանգատների քանակն աճի միտում ունի` քանզի պաշտպանության ենթակա խմբերի շրջանակը շարունակում է ընդլայնվել:
Իրավաբան-իրավապաշտպանների խումբն իր շնորհակալությունն է հայտնում բոլոր մասնավոր անձանց եւ կազմակերպություններին, որոնք գնահատելով գործընթացի կարեւորությունը եւ նշանակությունը, իրենց մասնագիտական եւ նյութական աջակցությունն են ցուցաբերում ադրբեջանական ագրեսիայի զոհերի իրավունքների պաշտպանության կազմակերպմանը: