Բիշքեկում «Եվրասիական տնտեսական միության թվային տարածքի ձեւավորում» կլոր սեղանի մասնակիցները, որին նախագահել են Եվրասիական տնտեսական հանձնաժողովի ներքին շուկաների, ինֆորմատիզացիայի եւ տեղեկատվական-հաղորդակցական տեխնոլոգիաների կոլեգիայի անդամ (նախարար) Կարինե Մինասյանը եւ Ղրղզստանի Հանրապետության տրանսպորտի եւ հաղորդակցության փոխնախարար Էռնիս Մամիրկանովը, քննարկել են Ղրղզստանի Հանրապետությունում տեղեկատվական հասարակության զարգացման, Եվրասիական տնտեսական միության (ԵԱՏՄ) թվային տարածքի ձեւավորման այժմեական հարցեր:
ԵՏՀ-ի մամուլի ծառայությունից NEWS.am-ին հայտնել են, որ միջոցառմանը մասնակցել են Ղրղզստանի Հանրապետության իշխանական մարմինների, գործարար հանրության, համալսարանների ներկայացուցիչներ:
Ղրղզական կողմի ներկայացուցիչները ներկայացրել են իրականացվելիք բարձր տեխնոլոգիական ծրագրեր եւ նախագծեր, այդ թվում` ակտիվ աշխատանք են ցուցադրել հանրապետությունում տեղեկատվական եւ հաղորդակցական տեխնոլոգիաների զարգացման պայմանների ստեղծման ուղղությամբ:
Մասնավորապես ներկայացվել են.
- բարձր տեխնոլոգիաների պարկի զարգացման հաջող մոդել, որը կառուցված է արտատարածքային սկզբունքով,
- տարանցիկ հաղորդակցական ներուժի, անդրսահմանային վստահության տարածքի մեծացման եւ հանրապետությունում հզոր հաշվիչ կենտրոնի ստեղծման նախագծեր:
ԵԱՏՄ թվային տարածքի ձեւավորման առաջարկների մշակման աշխատանքային խմբի ստեղծման կապակցությամբ կլոր սեղանի մասնակիցները քննարկել են թվային տարածքի ձեւավորման, ինտեգրացիոն գործընթացները միության ինչպես ներքին, այնպես էլ արտաքին ուրվագծում արդիականացնելու հեռանկարները:
Նիստի ընթացքում բարձրացվել են Եվրասիական տնտեսական միության եւ Մետաքսի ճանապարհի տնտեսական գոտու համադրման հարցեր` թվային ձեւափոխման համատեքստում, ինչպես նաեւ քննարկվել է գյուղատնտեսական թվային ձեւափոխման նախագծերի թողարկման հնարավորությունը:
Նիստի ավարտին ԵՏՀ նախարար Կարինե Մինասյանը նշել է, որ եկել է ժամանակը տեղեկատվական հասարակության զարգացման եւ հաղորդակցական ենթակառուցվածքների ձեւավորման օրակարգից անցնելու կառավարման ավանդական գործընթացների թվային ձեւափոխման օրակարգի:
