Նիդեռլանդները 9 տարեկանից երեխաներին կսկսեն ավելացնել ահաբեկչական ցուցակներում: Այս մասին հայտարարել է երկրի Ընդհանուր հետախուզության եւ անվգտանգության ծառայությունը:
Կազմակերպության տվյալներով, ԻՊ-ի վերահսկողության ներքո գտնվող տարածքներում ծնողների հետ բնակվող երեխաները 9 տարեկանից արդեն մարզվում են խմբավորման ճամբարներում:
«Նրանց սովորեցնում են կրակել, սառը զենք կիրառել եւ սպանել: Այդ տարիքում էլ նրանք հավատարմության երդում են տալիս ԻՊ-ի առաջնորդ Աբու Բաքր ալ-Բաղդադիին: Աղջիկներն էլ այդ տարիքից չադրա են կրում եւ սովորում, թե ինչպես պետք է իրենց ապագա ամուսնուն օգնեն զինված պայքարում»,- նշել են Նիդեռլանդների հետախուզական ծառայությունում:
Ըստ ՏԱՍՍ-ի, մասնագետները կարծում են, որ սա բավարար է այդպիսի երեխաներին վտանգավոր համարելու համար, եթե նրանք ընտանիքների հետ Նիդեռլանդներ վերադառնան: Հետախուզական ծառայությունն այդ երեխաներին հատուկ համարներով կներառի ահաբեկչական ցուցակներում: Այդ տեղեկությունը հասանելի կլինի նաեւ եվրոպական այլ երկրների անվտանգության ծառայություններին:
