Երեւանի Նոր Նորք վարչական շրջանի բնակիչ Լիանա Գենջոյանը բողոքում է, որ էլեկտրաէներգիայի հաշվիչի ցուցմունքը գերազանցել է սպառած էլեկտրաէներգիայի քանակը:
«Երեւանում եմ փետրվարի կեսից: 13-ից մինչեւ 29-ը՝ ընդամենը 16 օրում ծախսել եմ 624 կվ՝ 30 հազար դրամին համարժեք: Ու դա այն դեպքում, երբ ես միայն բջջային հեռախոս եմ միացնում լիցքավորման ու համակարգիչս: Ոչ լվացքի մեքենա եմ միացնում, ոչ արդուկ եմ անում, ոչ հեռուստացույց եմ միացնում, ու օրվա մեծ մասն էլ տանը չեմ լինում, աբսուրդ է: Մեր շենքի կողքին խանութ կա, որտեղ 3 սառնարան է աշխատում, առավոտյան 8-ից մինչեւ երեկոյան խանութը բաց է, ու 400 կվ հոսանք է սպառում»,- պատմեց NEWS.am-ի խմբագրություն ահազանգած քաղաքացին:
Լիանա Գենջոյանը պատմեց, որ երկար տարիներ Հայաստանում չի ապրել, այդ պատճառով սկզբում մտածել է՝ 624 կվ-ը վերաբերում է փետրվարին եւ մարտին սպառած էլեկտրաէներգիային, ապա, երբ տեսուչին է հանդիպել, իմացել է, որ նույնքան էլ կազմում է մարտին սպառած էլեկտրաէներգիան:
«Ասեցի՝ չեմ վճարելու, եկան, հոսանքս անջատեցին: Գնացի իրենց պետի մոտ, ասում ա՝ գնա հարեւանիդ հետ հարցերդ լուծի: Բայց հենց իրենք են, որ պետք է լուծեն խնդիրը»,- ասաց նա՝ նշելով, որ նախորդ օրը նկատել է, որ իր հաշվիչը տեղաշարժված է:
Լիանան նշեց, որ Ջրվեժի Մայակ թաղամասի իրենց շենքի բնակիչներից մի քանիսը նույնպես միանում են իր բողոքին: