Հայաստանը չի քննարկում Լեռնային Ղարաբաղի ճանաչումը, դա խորհրդարանի երկու անդամի առաջարկությունն է: Այս մասին ՌԻԱ Նովոստիին տված հարցազրույցում հայտարարել է ՌԴ ԱԳ նախարար Սերգեյ Լավրովը:
Նրա խոսքով, օրենքի համաձայն՝ Հայաստանի կառավարությունը, ինչպես բոլորին պարզաբանեցին, հանդարտեցնելով կրքերը՝ պետք է այդ օրինագծի շուրջ եզրակացություն նախապատրաստի:
«Հիմա ահազանգ չեմ հնչեցնելու եւ խուճապի մատնվելու: Երբ Երեւանում էի, զրուցեցի իմ գործընկեր Էդվարդ Նալբանդյանի հետ, իսկ հետո Մոսկվայում՝ արդեն ապրիլի սկզբի իրադարձություններից հետո, ինձ հստակ հաստատեցին խաղաղ կարգավորմանը Երեւանի հավատարմությունը: Դա նշանակում է, որ Ղարաբաղի կարգավիճակը կորոշվի ընդհանուր պայմանավորվածությունների համատեքստում, այլ ոչ միակողմ կարգով»,- ընդգծել է Սերգեյ Լավրովը:
Հիշեցնենք, որ մայիսի 5-ին Հայաստանի կառավարությունը քննարկելու է ԱԺ պատգամավորներ Զարուհի Փոստանջյանի եւ Հրանտ Բագրատյանի ներկայացրած՝ «Արցախի Հանրապետությունը ճանաչելու մասին» օրենքի նախագիծը:
