Ստեփանակերտի փողոցներում բազմաթիվ օտարերկրացի զբոսաշրջիկների կարելի է տեսնել, նույնիսկ այս օրերին։ Ճապոնացի Թագիշի Սգիմոտոյին Արցախում ամենաշատը դուր են եկել մարդիկ, որոնք բարի են եւ սիրալիր իր նկատմամբ:
«Մինչեւ Հայաստան գալս եղել եմ Ադրբեջանում եւ Վրաստանում: Այնտեղ մարդիկ սառն են, իսկ Հայաստանում եւ Լեռնային Ղարաբաղում մարդիկ շատ սիրալիր են: Ձեզ մոտ ապահով է»,- NEWS.am-ի թղթակցի հետ զրույցում ասում է Թագիշին:
Ճապոնացին Արցախ է եկել մայիսի 4-ին վաղ առավոտյան` երթուղային տաքսիով, այցելել է Շուշի եւ Գանձասար, ապա Ստեփանակերտ:
«Ընկերներս նախկինում եղել են Լեռնային Ղարաբաղում ու ինձ պատմել էին: Իհարկե իրենք նաեւ Ակնա էին գնացել, բայց ես ընդամենը մեկ օր ունեմ եւ չեմ հասցնի շատ տեղեր այցելել»,- նշում է ճապոնացի տուրիստը:
Թեեւ Թագիշին լսել էր, որ իրավիճակն այստեղ լարված է, որոշել էր անձամբ գալ եւ տեսնել այն երկիրը, որի համար «Հայաստանն ու Ադրբեջանը պատերազմում են»:
Թագիշի Սգիմոտոն մայիսի 5-ին վաղ առավոտյան վերադառնալու է կրկին Երեւան եւ օրեր անց մեկնելու է Թբիլիսի: