Ռուսաստանում մայիսի 4-ին Սամարայի մարզում ոստիկանի ընտանիքի սպանության մեղադրանք է առաջադրվել երեք ադրբեջանցիների: Այս մասին հաղորդել է ՌԴ Քննչական կոմիտեի պաշտոնական ներկայացուցիչ Վլադիմիր Մարկինը:
Նրա խոսքով, երեք կասկածյալների՝ Իսլամ Բաբաեւին, Օրհան Զոհրաբովին եւ Ռոման Ֆատալեւին երկու եւ ավելի անձի սպանության, անչափահասի դեմ մահափորձի մեղադրանք է առաջադրվել:
Քննչական կոմիտե բերման է ենթարկվել նաեւ Մահմադալի Ահմադովը, որին մայիսի 4-ին ձերբակալել են Մոսկվայի «Դոմոդեդովո» օդանավակայանում Ռուսաստանի սահմանը հատելու փորձի ժամանակ:
Ինտերֆաքսը հիշեցնում է, որ Սազրանի շրջանի ոստիկանության նախկին ղեկավար Անդրեյ Գոշտայի եւ նրա ընտանիքի հետ հաշվեհարդար են տեսել ապրիլի 23-ի լույս 24-ի գիշերը, Անդրեյ Գոշտայի ծնողների՝ Իվակեւկա գյուղի տանը: Առավոտյան զոհվածի եղբայրը հարազատներին գտել է արնաշաղախ անկողիններում:
Հարձակման զոհերը մահացել են գանգուղեղային վնասվածքներից: Ողջ է մնացել միայն Գոշտայի փոքրիկ զարմուհի Սոֆիան: Նա կոմայի մեջ է: Բժիշկները զերծ են մնում կանխատեսումներից:
