ՌԴ Սիզրան քաղաքի նախկին ոստիկանապետ Անդրեյ Գոշտի եւ նրա ընտանիքի սպանության 4-րդ կասկածյալը՝ Տաջիկստանի քաղաքացի Մահմադլի Ահմադովը հայտարարել է, թե անմեղ է։ Այս մասին հայտնում է «ՌԻԱ Նովոստի»-ն՝ վկայակոչելով Տաջիկստանի ՆԳՆ-ին։
«Այս շաբաթվա սկզբին Մահմադլի Ահմեդովն ինքն է ներկայացել ՆԳՆ եւ հայտնել, որ ռուսական լրատվամիջոցներից տեղեկացել է, որ իրեն կասկածում են Սամարայի մարզում ընտանիքի 6 անդամների սպանության մեջ։ Նա հայտնել է, որ կապ չունի այդ հանցագործության հետ եւ մտադիր է վերադառնալ ՌԴ իր անմեղությունն ապացուցելու համար»,- ասված է ՆԳՆ տարածած հայտարարության մեջ։
Գերատեսչությունից հայտնել են, որ Ահմադովին չեն ձերբակալել Տաջիկստանի եւ Աֆղանստանի սահմանին, ինչպես նախկինում հաղորդվում էր, քանի որ ռուսական կողմը չէր հաստատել, որ նա հետախուզման մեջ է գտնվում։ Տաջիկստանի սահմանապահ ծառայությունը հերքել էր լուրերը, թե Ահմադովին ձերբակալել են Տաջիկստանի եւ Աֆղանստանի սահմանին։
ՌԴ ՔԿ մամուլի ծառայությունից ավելի ուշ հայտնել էին, որ գործով անցնող ֆիգուրանտին ձերբակալել են Դոմոդեդովո օդանավակայանում Դուշանբեից ժամանելուց հետո։
Նշենք, որ Գոշտ ընտանիքի սպանությունը տեղի էր ունեցել ապրիլի 24-ին։ Սպանության ենթադրյալ մեղավորներն են Իսլամ Բաբաեւը, Օրհան Զոհրաբովը, Ռոման Ֆաթալիեւը եւ Մահմադլի Ահմադովը։ Նրանք կալանավորված են։
