Ոչ պատերազմական իրավիճակում գործող խաղի կանոնները որոշ փոփոխություններ պետք է կրեն պատերազմի ժամանակ, եւ քաղաքական ուժերը պետք է հետքայլ կատարեն: Այս մասին, այսօր՝ մայիսի 5-ին, Ժողովրդավարության ազգային պլատֆորմի» նախաձեռնած քննարկման ժամանակ նշել է ԱԺ ՀԱԿ խմբակցության քարտուղար Արամ Մանուկյանը՝ հավելելով, որ դա չի նշանակում, որ առկա խնդիրներին պետք չէ անդրադառնալ:
Անդրադառնալով որոշ գեներալների կողմից բիզնեսներ ու մենաշնորհներ ունենալուն, նա ընդգծեց, որ իշխանությունը չպետք է հանդուրժի նման բաներ: «Ես որ լինեի՝ գեներալների ուսադիրները ցուցադրաբար կպոկեի, Միհրան Պողոսյանին շնորհակալություն չէի հայտնի աշխատանքի համար, երբ որ օֆշորների մեջ է։ Միասնականություն ենք պահանջում, ուրեմն լինում է քաղաքական գործընթացի մի քիչ նահանջ, բայց դա չի նշանակում, որ մենք իշխանությունների շուրջ ենք համախմբվում, մենք համախմբվել ենք գաղափարի շուրջ, որ զինվորի ոգին բարձրանա»,-ասաց պատգամավորը:
Արամ Մանուկյանի խոսքով, Ղարաբաղի հարցի լավագույն լուծումը ուժեղ Հայաստանն է: «Ղարաբաղը թույլ է այնքան, ինչքան թույլ է Հայաստանը։ Ներսում պիտի լինի սոցիալական հանդարտություն, վստահելիություն, մարդու իրավունքների պաշտպանություն, դրսում՝ բարեկամների, համախոհների աճ։ Ու այս դեպքում կունենանք ուժեղ Հայաստան։ Ղարաբաղի լուծումն այն չէ, որ խորհրդարանում խոսափող են քրտնացնում»,- ընդգծեց ՀԱԿ խմբակցության քարտուղարը:
