Ռուսաստանի ԱԳ նախարար Սերգեյ Լավրովի հայտարարության մեջ կան հատվածներ, որոնք շատ հստակ են: Այս մասին, այսօր՝ մայիսի 5-ին, կառավարության նիստից հետո լրագրողների հետ զրույցում նշել է Հայաստանի ԱԳ փոխնախարար Շավարշ Քոչարյանը:
«Առաջինը, որ այլընտրանք չկա խաղաղ կարգավորմանը, որին մենք կողմ ենք, իհարկե չկա այլընտրանք: Երկրորդ՝ պետք է ամրապնդվի կրակի դադարեցման ռեժիմը, այն ինչի մասին ասել է նաեւ Երեւանում: Այնպես որ այդ ամենը նորմալ է»,-ասաց Քոչարյանը:
Ինչ վերաբերում է ԼՂՀ ճանաչման խնդրին, ԱԳ փոխնախարարը նշեց. «Մեր դիրքորոշումը շատ հստակ է, ու եթե Ադրբեջանը փորձի խուսափել զինադադարի հաստատման ռեժիմից և նոր ագրեսիա ծավալի, ապա Ղարաբաղի ճանաչման հարցը միանշանակ կմտնի օրակարգ»:
Ավելի վաղ NEWS.am-ը հայտնել էր, որ Ռուսաստանի ԱԳ նախարար Սերգեյ Լավրովը «ՌԻԱ նովոստիին» տված հարցազրույցում նշել էր, որ Հայաստանը չի քննարկում Լեռնային Ղարաբաղի ճանաչումը, դա խորհրդարանի երկու անդամի առաջարկությունն է, իսկ ՀՀ կառավարությունը պետք է այդ օրինագծի շուրջ եզրակացություն նախապատրաստի:
«Հիմա ահազանգ չեմ հնչեցնելու եւ խուճապի մատնվելու: Երբ Երեւանում էի, զրուցեցի իմ գործընկեր Էդվարդ Նալբանդյանի հետ, իսկ հետո Մոսկվայում՝ արդեն ապրիլի սկզբի իրադարձություններից հետո, ինձ հստակ հաստատեցին խաղաղ կարգավորմանը Երեւանի հավատարմությունը: Դա նշանակում է, որ Ղարաբաղի կարգավիճակը կորոշվի ընդհանուր պայմանավորվածությունների համատեքստում, այլ ոչ միակողմ կարգով»,- ընդգծել է Սերգեյ Լավրովը:
Նա նաեւ նշել է, որ իհարկե, ամենակարեւոր խնդիրը զոհերից խուսափելն է, հրադադարի ցանկացած խախտումը կանխելը, դրա համար գործուն միջոցներ եւ մեխանիզմներ մշակելը:
Նշենք, որ ՀՀ կառավարությունն, այսօր՝ մայիսի 5-ին, իր նիստում հավանություն տվեց Ազգային ժողովի պատգամավորներ Զարուհի Փոստանջյանի եւ Հրանտ Բագրատյանի՝ օրենսդրական նախաձեռնության կարգով ներկայացրած «Արցախի Հանրապետությունը ճանաչելու մասին» ՀՀ օրենքի նախագծի վերաբերյալ կառավարության եզրակացության նախագծին: Այն կքննարկվի խորհրդարանում:
