Արցախի ճանաչման հարցը ստեղծված իրավիճակի համատեքստում է քննարկվում, սակայն ցանկալի չէ, որ իրավիճակային լուծումներ գտնվեն, ճիշտ կլինի, որ հայեցակարգ ունենանք։ Այս մասին, այսօր՝ մայիսի 5-ին, լրագրողների հետ հանդիպման ժամանակ հայտարարել է «ժառանգություն» խմբակցության պատգամավոր Զարուհի Փոստանջյանն՝ անդրադառնալով այն փաստին, որ կառավարությունը հավանություն է տվել իր եւ Հրանտ Բագրատյանի հեղինակած՝ Արցախի անկախության ճանաչման մասին նախագծի վերաբերյալ կառավարության եզարկացությանը:
«Ամեն րոպե իրավիճակ է փոխվում, եւ ես չէի ցանկանա, որ մենք իրավիճակային լուծումներ գտնենք: Ճիշտ կլիներ, որ մենք մեր հայեցակարգն ունենայինք այս ամենի վերաբերյալ եւ ունենայինք մեր հստակ ժամանակացույցը՝ ինչ ենք անելու եւ երբ, քանի որ հիմա ամեն ինչ իրավիճակային է, այս հարցն էլ իրավիճակի համատեքստում է քննարկվում»,-ասել է Փոստանջյանը։
Հարցին, թե մտավախություն չունի՞, որ կառավարությունը դրական եզրակացություն տվեց, որպեսզի խորհրդարանում հարցը քննարկվի, բայց վերջում դեմ քվեարկեն այդ նախագծին, Փոստանջյանն արձագանքեց. «Չեմ բացառում, այնպես չէ, որ ՀՀ Ազգային ժողովում գործում են անկախ անձինք: Կարծում եմ, այո, նրանից շատերը հրամանի ներքո են գործում եւ ոչ թե խղճի, եւ եթե լինի հակառակ հրաման եւ չլինի հանրության դիմադրություն, ապա չի բացառվում, որ այդ հրամանը գործի»։