Առայժմ ամեն ինչ գնում է այն ուղղությամբ, որ ղարաբաղյան հակամարտության գոտում պատերազմը կարող է սկսվել ցանկացած պահի. ոչ մի զսպիչ գործոն չկա: Այդ մասին NEWS.am-ի թղթակցին հայտնել է ԱՊՀ-ի երկրների Կովկասի ինստիտուտի բաժնի վարիչ, Հասարակական-քաղաքական հետազոտությունների կենտրոնի տնօրեն, ռազմական փորձագետ Վլադիմիր Եվսեեւը:
Նրա խոսքով, ադրբեջանական կողմից զոհերի թիվը նշանակություն չունի: «Այդ մասին ուղիղ ասվել է, միաժամանակ զոհերի թիվը գաղտնի կպահվի, որովհետեւ որոշ տվյալների համաձայն, ադրբեջանական կողմն այն նվազեցնում է 20 անգամ: Նման պայմաններում կարելի է բավականին երկար պատերազմել», - նշել է Եվսեեւը: Ռազմական փորձագետն արձանագրել է, որ գրոհը հետ է մղվել, ընդ որում` մեծ վնասներ հասցնելով: «Փաստացիորեն ադրբեջանական կողմին հաջողվել է պահել ընդամենը մեկ բարձունք: Եվ այդ պատճառով ցանկություն կա ամեն ինչ կրկնելու, հաշվի ատնելով այն սխալները, որոնք թույլ են տրվել անցած անգամ: Եվ այժմ, կարծում եմ, որ նրանք իրենց զորքը չեն ուղարկի հայկական դիրքերի ուղղությամբ, առանց հզոր հրետանային նախապատրաստության», - ընդգծել է Եվսեեւը: Առաջնագծում, շարունակել է նա, բավականաչափ զինամթերք, գիշերային տեսողության սարքեր կլինեն: «Ես շատ կուզեի, որ հայկական կողմն ավելի շատ անօդաչու թռչող սարքեր ունենա: Ամեն դեպքում, Ռուսաստանը հավանաբար կարող էր կիսվել նրանով, ինչ ունի: Իրավիճակը ծայրաստիճան պայթյունավտանգ է: Ես չեմ տեսնում այն քայլերը, որոնք կարող են կանխել դեպքերի անբարենպաստ զարգացումը», - նշել է Վլադիմիր Եվսեեւը: Այն, ինչ այժմ արվում է, նրա տեսանկյունից բավարար չէ: «Հակամարտությունն արդեն ապասառեցված է: Ապասառեցված հակամարտության պայմաններում անհրաժեշտ է շտապ միջոցներ ձեռք առնել թույլ չտալու ողբերգության կրկնությունը, որը տեղի է ունեցել ապրիլի սկզբին: Եվ այժմ ամեն ինչ հանգում է նրան, որ ապրիլի սկզբի իրավիճակի կրկնություն կլինի` զոհերի ավելի մեծ քանակությամբ: Բացի այդ, ես ենթադրում եմ, որ Ռուսաստանը կարող էր եւ պարտավոր է ամրապնդել Հայաստանի հակաօդային պաշտպանությունը, որովհետեւ ոչ ոք չի կարող բացառել ադրբեջանական կողմից ոչ միայն Լեռնային Ղարաբաղին, այլեւ Հայաստանի տարածքին հարվածներ հասցնելու փորձերը», - ընդգծել է Եվսեեւը: Եթե ուղղակիորեն սպառնում են հարված հասցնել Ստեփանակերտին, հազիվ թե չփորձեն հարված հասցնել Հայաստանի տարածքին:
«Այն գործողությունները, որոնք ձեռք է առնում ռուսական կողմը, ես անբավարար եմ համարում: Այդ առումով իր գործը չի անում նաեւ Ֆրանսիան, որը ԵԱՀԿ-ի Մինսկի խմբի անդամ է, սակայն իր գործառույթներն ամբողջությամբ չի կատարում: Ենթադրում եմ, որ ԱՄՆ-ը կարող էր մի քիչ ավելին անել հակամարտության կրկնության հնարավորությունը նվազեցնելու համար», - նշել է Վլադիմիր Եվսեեւը: Այն, ինչ արվել է, նպաստել է պատերազմը կանգնեցնելուն, բայց պատերազմը կանգ է առել ոչ թե նրա համար, որ միջամտել է Ռուսաստանը կամ ԱՄՆ-ն, այլ որովհետեւ հայկական կողմը դուրս է եկել նախկինում զբաղեցրած դիրքեր: «Եվ դրանից հետո Ադրբեջանը պատրաստ էր բանակցությունների: Այսինքն միջնորդներն այդ առումով ոչ մի դեր չեն խաղացել: Այստեղ միջնորդներից այնուամենայնիվ այնքան էլ շատ բան չի կախված, շատ բան կախված է հերոս հայ զինծառայողներից, որոնք գտնվում են առաջնագծում», - եզրափակել է Վլադիմիր Եվսեեւը:
