Երեւանը ներկայացվել է Թբիլիսիում անցկացված տուրիզմի միջազգային 18-րդ Կովկասյան զբոսաշրջային ցուցահանդեսին («Caucasus Tourism Fair CTF 2016»): Միջոցառմանը մասնակցել են զբոսաշրջային եւ հյուրանոցային բիզնեսի ավելի քան 100 ընկերություններ՝ Հայաստանից, Վրաստանից, Էստոնիայից, Ինդոնեզիայից, Թայլանդից եւ մի շարք այլ երկրներից:
Երեւան քաղաքը ցուցահանդեսին մասնակցել է իր առանձին տաղավարով, որտեղ ներկայացվել են մայրաքաղաքի՝ որպես զբոսաշրջային նախընտրելի ուղղության առանձնահատկությունները: Երեւանի քաղաքապետարանը ցուցահանդեսին մասնակցել է Թբիլիսիի քաղաքապետարանի հրավերով:
Երեւանի տաղավարում ցուցահանդեսին ներկայացվել են նաեւ զբոսաշրջային 4 գործակալություններ:
Երեւանի քաղաքապետարանի մշակույթի եւ տուրիզմի վարչության տուրիզմի բաժնի պետ Մայա Թոխալյանը նշել է, որ երեք օր շարունակ Երեւանն ու մասնակից մյուս քաղաքները հնարավորություն են ունեցել ներկայացնել տարածաշրջանում իրենց մրցունակությունը, ինչպես նաեւ զբոսաշրջության ոլորտում փոխշահավետ համագործակցության հնարավորությունները:
«Երեւանից ու առհասարակ Հայաստանից մեկնող զբոսաշրջիկները զբաղեցնում են առաջին տեղը Վրաստանի զբոսաշրջային սանդղակում: Այսօր մեզ համար կարեւոր է, որպեսզի Երեւանը գրավիչ դառնա վրացի զբոսաշրջիկների համար՝ հատկապես հաշվի առնելով, որ Թբիլիսիից Երեւան ընդամենը 4.5 ժամ հեռավորություն է, ավելի մոտ քան, օրինակ, Բաթումը: Երեւանը գրավիչ է նաեւ իր` տարեցտարի զարգացող եւ ավելի ու ավելի մեծ թվով զբոսաշրջիկների հետաքրքրող փառատոնային տուրիզմով: Աշխարհում ընդունված հանգստյան օրերի կարճատեւ ճամփորդությունների ցանկում եւս վրացի զբոսաշրջիկների համար Երեւանը լիովին նախընտրելի ուղղություն կարող է դառնալ: Ցուցահանդեսի անցկացումը լավ հնարավորություն էր Երեւանը ներկայացնելու զբոսաշրջային նման հարթակում՝ միաժամանակ ուսումնասիրելով տարբեր երկրների փորձը»,-նշել է Մայա Թոխալյանը` տեղեկացնելով նաեւ, որ ցուցահանդեսի շրջանակում գործընկեր քաղաքների հետ ձեռք են բերվել որոշակի պայմանավորվածություններ՝ համագործակցության ընդլայնման եւ դեպի Երեւան տուրիզմի զարգացման ուղղությամբ:
Երեւանի քաղաքապետարանի տուրիզմի բաժինը մասնակցել է «Caucasus Tourism Fair CTF 2016» ցուցահանդեսի շրջանակում անցկացվող միջազգային համաժողովին:
