Երեւանի Հալաբյան փողոցում ապրիլի 25-ին թիվ 63 երթուղու պայթյունի հետեւանքով վիրավորված 15-ամյա Ռոլանդ Խոջայանն ու 14-ամյա Էդգար Գասպարյանն արդեն ապաքինվում են: Նրանք Երեւանի «Սուրբ Աստվածամայր» հիվանդանոցի Վերակենդանացման բաժանմունքից Մանկական վիրաբուժության բաժանմունք տեղափոխվելուց հետո, առաջին հարցազրույցն են տվել NEWS.am-ին:
Մեզ հետ զրույցում տղաները պատմեցին, որ ավտոբուս բարձրացել են «Թումոյից» դուրս գալուց հետո, երկուսով նստել են ավտոբուսի նախավերջին շարքի նստարանին, պայթյունի ժամանակ Էդգարը մոր հետ հեռախոսով զրուցելիս է եղել, իսկ Ռոլանդն ականջակալով երաժշտություն լսելիս: Պայթյունը տեղի է ունեցել թիվ 63 երթուղու ավտոբուսը նստելուց 30 վայրկյան անց. «Շատ բան չեմ հիշում դեպքից, հիշում եմ, որ բարձրացանք ավտոբուս, նստեցինք, ուզում էի ականջակալ դնեի, հանկարծ սեւացավ շուրջս, ականջներումս ձայներ լսեցի: Հետո ինձ թվում էր` գոռում էի, որ գային օգնեին, չեմ հիշում նստած էի, թե կանգնած: Բայց քիչ հետո ինչ-որ մեկի ձայնը լսեցի, ասաց` ախպերս, չվախենաս, տուն ենք գնում, նոր հասկացա, որ ողջ եմ: Զգացի, որ մեքենա նստեցրին ու հիվանդանոց էին տանում: Որ նստեցրին տաքսու մեջ` հրեշտակ տեսա, ասաց, որ ոչ ոքի չհավատաս, քո սրտի ձայներին կլսես միայն ու երբ հիվանդանոց եկանք, չեմ հիշում` ուր էին տանում, սեւ շորերով մարդ տեսա, էդ մարդն ինձ ասում էր` չշնչեմ ու իրա հետ գնամ, էդ պահին հրեշտակի խոսքերը հիշեցի ու սկսեցի արագ-արագ շնչել»,-պատմեց Ռոլանդը:
Ավտոբուսի պայթյունից տուժած մյուս պատանին` Էդգարը, նույնպես շատ բան չի հիշում դեպքից, միայն հիշում է, որ պայթյունից հետո կոտրված պատուհանից իրեն քաղաքացիները հանել են եւ մեքենայով տեղափոխել հիվանդանոց: Նրա խոսքով, ինքն ու Ռոլանդը, հիմնականում այլ համարի երթուղային տաքսիներով են դասերից հետո տուն գնացել, սակայն, այդ օրը թիվ 63 համարի ավտոբուսը դատարկ է եղել եւ նրանք որոշել են դրանով գնալ տուն, որն էլ նրանաց համար ճակատագրական է եղել.«Երբ հեռախոսով խոսում էի, ականջներիս մեջ ձայն մտավ, կողքիս ապակին փշրվեց տենց դուրս կախվեցի, եկան օգնեցին: Ինձ Հարութ անունով տղա օգնեց,հետո քաղաքացիները մեքենա նստեցրին ու մոտակա հիվանդանոց տեղափոխեցին»:
Նշենք, որ 2002թ. ծնված Էդգար Գասպարյանը եւ 2001թ. ծնված Ռոլանդ Խոջայանը ունեն բեկորային վիրավորումներ, վնասվածքներ եւ այրվածքներ։ Նրանք պայթյունից անմիջապես հետո վիրահատության էին ենթարկվել: Այժմ գիտակցության են, սակայն քայլել չեն կարողանում:
Հիշեցնենք, որ որ թիվ 63 համարի ավտոբուսը պայթել է ապրիլի 25-ին, ժամը 21:45-ի սահմանում, Երեւանի Հալաբյան փողոցի թիվ 11 շենքի մոտ: Կա երկու զոհ եւ 8 տուժած:
Քննչական կոմիտեն հայտնել էր, որ պայթած ավտոբուսի վայրի զննությամբ, ի թիվս քրեական գործով էական նշանակություն ունեցող այլ առարկաների, հայտնաբերվել է բջջային հեռախոսային քարտ։ Քննությամբ եւ ԱԱԾ-ի հետ համատեղ իրականացված օպերատիվ-հետախուզական միջոցառումների արդյունքում պարզվել է, որ դեպքի վայրում հայտնաբերված բջջային հեռախոսային քարտի բաժանորդը կենցաղային հողի վրա դժգոհություն է ունեցել ազգականների հետ եւ նախապատրաստվել է պայթեցման եղականով վնասել նրանց:
ԱԱԾ օպերատիվ-հետախուզական մարմինների հետ համագործակցաբար պարզվել է տվյալ քարտի բաժանորդի ինքնությունը, որը ՀՀ քաղաքացի Ռուբեն Բալյանն է, նախկինում երկու անգամ դատված։ Նրա բնակության վայրում ապրիլի 26-ին իրականացված խուզարկությամբ հայտնաբերվել է «տրոտիլ» տեսակի պայթուցիկ նյութ, պայթուցիչ սարքեր (դետոնատոր) եւ տարբեր տեսակի էլեկտրասարքավորումներ:
«Տրոտիլ» տեսակի պայթուցիկ նյութի տարրեր, հետքեր հայտնաբերվել են նաեւ ավտոբուսի եւ դեպքի վայրի զննությամբ առգրավված փորձանմուշների վրա, ինչը հիմնավորվել է նշանակված փորձաքննության նախնական եզրակացությամբ:
Ավտոբուսի պայթեցման ենթադրյալ մեղավոր Ռուբեն Բալյանն ավարտել է ԵՊՀ-ի Երկրաբանության ֆակուլտետը, այնուհետեւ ՀՀ ԳԱԱ-ի Երկրաբանության ֆակուլտետեում աշխատել որպես գիտաշխատող: Նա երկու անգամ դատված է եղել սպանության հանցակցության եւ ապօրինի զենք պահելու մեղադրանքներով: