Քանի դեռ բանակցությունները չեն վերսկսվել, քանի դեռ Ադրբեջանը կուտակումներ է իրականացնում, պետք է պատրաստ լինենք ցանկացած սցենարի։ Այդ մասին ՀՀԿ ԳՄ նիստից հետո լրագրողներին ասել է ՀՀԿ մամուլի քարտուղար, ԱԺ փոխնախագահ Էդուարդ Շարմազանովը։
ՀՀԿ գործադիր մարմնում, ըստ Շարմազանովի, քննարկվել են ներքաղաքական, արտաքին քաղաքական հարցեր, մասնավորապես շփման գծի իրավիճակը։
«Մի բան պարզ է, որ քանի դեռ բանակցությունները չեն վերսկսվել, քանի դեռ Ադրբեջանը կուտակումներ է իրականացնում, պետք է պատրաստ լինենք ցանկացած սցենարի։
Ադրբեջանը ձգտում է խնդիրը լուծել ռազմական ճանապարհով։ Մեկ անգամ տապալվեց։
ՀՀ-ն եւ ԼՂՀ-ն խնդրի բացառապես խաղաղ կարգավորման կողմնակից են։ Պետք է մեկ բան հստակ իմանանք, որ թե ռազմաճակատում, թե դիվանագիտական ճակատում ուժեղ եւ միասնական լինենք»,- նշել է նա։
Ըստ ՀՀԿ մամուլի քարտուղարի՝ եթե Ադրբեջանը փորձի ռազմական ճանապարհով, ագրեսիվ եւ ահաբեկչական ճանապարհով լուծել Լեռնային Ղարաբաղի խնդիրը, նոր պատերազմ հրահրի, Հայաստանի Հանրապետությունը կիրականացնի նախագահի նախանշած քայլերը, ընդհուպ մինչեւ ԼՂՀ ճանաչում։
«Հայաստանի նպատակն է ԼՂՀ միջազգային ճանաչումը։ Եւ դրա համար անելու է ամեն ինչ, որ Արցախը լինի միջազգային իրավունքի սուբյեկտ, իսկ ժողովուրդն ապրի անվտանգ երկրում։ Ուզեն, Արեւմուտքում, թե չուզեն»,- նշել է Շարմազանովը։