Շիրակի մարզի Ախուրյանի Մոր ու մանկան հիվանդանոցում այսօր՝ մայիսի 6-ին, ծնվել է Թալիշում ապրիլի 3-ին զոհված Հրաչ Գալստյանի եւ Անուշ Օհանյանի դուստրը: Հիվանդանոցից մեզ տեղեկացրին, որ ծննդաբերությունը նորմալ է ընթացել, հիվանդանոցում են մնալու մինչեւ մայիսի 12-ը:
«Երեխային անվանել են Անահիտ՝ հոր ցանկությամբ, երեխան ժամկետից 10 օր շուտ է ծնվել՝ նրա լույս աշխարհ գալուն սպասում էին մայիսի 17-ին»,-ասացին հիվանդանոցից:
Հիշեցնենք, որ 25-ամյա Հրաչ Գալստյանը Գյումրիից էր, նա զոհվել է ապրիլի 3-ին՝ արցախա-ադրբեջանական շփման գծում տեղի ունեցած քառօրյա պատերազմի ժամանակ: Hetq.am-ի փոխանցմամբ՝ Հրաչի ու Անուշի սիրո պատմությունը սկսվել է Արցախի Թալիշ գյուղում: Անուշը դեռ դպրոցական է եղել, երբ գյումրեցի Հրաչ Գալստյանն ավարտել է Վազգեն Սարգսյանի անվան ռազմական ինստիտուտն ու ծառայության անցել Թալիշում: Անուշի Վերջին զանգի օրն էլ նշանադրվել են: Ապրիլի 1-ի գիշերը, երբ գյուղը սկսել են ռմբակոծել, Հրաչի մեջքը քերծվել է աներոջ տան կոտրված ապակիներից եւ նա կատակով ասել է՝ «վիրավոր ունեք»:
Ապրիլի 2-ին Հրաչն իր սիրելիին եւ նրա հարազատներին Թալիշից հանել է եւ ինքը մենել մարտադաշտ:
Լուսանկարները՝ Hetq.am-ի