Բրուքլինի լողափերից մեկում ջրի ալիքները ափ են նետել տղամարդու մարմին, որի գլուխը փաթաթված է եղել կպչուն ժապավենով, իսկ ոտքերը՝ ցեմենտով լցված դույլի մեջ, հայտնում է Sky News-ը։

Ենթադրվում է, որ դա 28-ամյա Պետեր Մարտինեսն է, որի ինքնությունը հաջողվել է ճանաչել դաջվածքների միջոցով։

Նյու Յորքի ոստիկանության դեպարտամենտից հայտնել են, որ տղամարդու մարմինը եղել է պլաստիկե պարկի մեջ, իսկ ձեռքերը՝ կապկպված։ Իշխանությունները չեն կարողացել պարզել, թե Մարտինեսը ո՞ղջ է եղել այն պահին, երբ նրա ոտքերը ընկղմել են ցեմենտով լի դույլի մեջ։

Ոստիկանությունից Sky News-ի աղբյուրները հայտնել են, որ տղամարդը պատկանում էր G Stone Crip խմբավորմանը։ Նա 30 անգամ քրեական պատասխանատվության էր ենթարկվել։ Իսկ նրա ընկերուհին 2016թ. փետրվարին հայտնել էր, որ ընկերն անհետացել է։

Հաղորդվում է, որ թեպետ զոհերի ոտքերը ցեմենտով պատելը մաֆիայի գործելաոճին բնորոշ  հայտնի քաղաքային լեգենդ է, սակայն Մարտինեսն այդ երեւույթի առաջին պաշտոնապես գրանցված նման զոհն է։