Գյումրիում մայիսի 3-ին դանակահարված տաքսու վարորդ 49-ամյա Աշոտ Է.-ն «Գյումրի» բժշկական կենտրոնի Վերակենդանացման բաժանմունքից տեղափոխվել է Վիրաբուժական բաժանմունք: NEWS.am-ին այսօր՝ մայիսի 6-ին, հիվանդանոցից տեղեկացրին, որ տղամարդու վիճակը միջին ծանրության է, գիտակցության է եկել եւ կարողանում է շփվել հարազատների հետ:
Նշենք, որ 49-ամյա տղամարդու մոտ մոտ ախտորոշվել էր որովայնի առաջնային պատի ծակած-կտրած թափանցող վերք, բարակ եւ հաստ աղիների վնասվածք, ներքին արյունահոսություն:
Աշոտ Է.-ն տաքսու վարորդ է, նույն օրը Գյումրիի 8-րդ թաղամասում 23-ամյա Հովհաննես Պիճիկյանը վիճաբանության ժամանակ դանակահարել էր նաեւ Գյումրի քաղաքի բնակիչ 50-ամյա Արթուր Չ.-ին,որը մահացել էր:
Հովհաննես Պիճիկյանը բերման է ենթարկվել:
Մահվան ելքով դանակահարության դեպքով հարուցվել է քրեական գործ՝ ՔՕ 104-րդ հոդվածի 1-ին մասով (Սպանությունը՝ ապօրինաբար մեկ ուրիշին դիտավորությամբ կյանքից զրկելը, որը պատժվում է ազատազրկմամբ՝ 6-12 տարի ժամկետով) եւ 104-րդ հոդվածի 2-րդ մասով (Սպանությունը՝ անձի կամ նրա մերձավորի՝ կապված այդ անձի կողմից իր ծառայողական գործունեության կամ հասարակական պարտքի կատարման հետ, որը պատժվում է ազատազրկմամբ՝ 8-15 տարի ժամկետով, կամ ցմահ ազատազրկմամբ):