Երթուղայինները նախկինի պես խանգարում են Երեւանում երթեւեկությանն ու երեւանցիներին։ Այս մասին մայիսի 6-ին լրագրողներին ասել է «Սպառողների խորհրդատվության կենտրոն» ՀԿ-ի ղեկավար Կարեն Չիլինգարյանը։
Նրա խոսքով՝ 2 տարի առաջ Երեւանի քաղաքապետարանը հայտնել էր, որ 100 դրամ սակագինը շատ ցածր է ինքնարժեքից թե՛ երթուղայինի, թե՛ ավտոբուսի համար։ Բայց արդեն 2 տարի է անցել, եւ երթուղայինները երթեւեկում են 100 դրամով։ «Ո՞վ կարող է իրեն թույլ տալ 2 տարի վնասով աշխատել։ Իսկ մեզ փորձում են համոզել, թե կարող են։ Քաղաքապետարանը անգամ միջազգային աուդիտորի էր հրավիրել, որը դա հիմնավորել էր։ Բայց պարզ է, որ միշտ էլ կարելի է հրավիրել մի աուդիտորի, որը կասի եւ կգրի այնպես, ինչպես պետք է։ Իսկ արդյունքում երեւանցիները երթեւեկում են այնպիսի երթուղայիններով, որոնցով չի կարելի անգամ ներքաղաքային տեղափոխություն կազմակերպել։ Դրանք այդ նպատակի համար չեն նախատեսված»,- նշել է Չիլինգարյանը։
Փորձագետի կարծիքով միկրոավտոբուսներ՝ որպես այդպիսիք, կարող են լինել, բայց հիմնական ծանրաբեռնվածությունը չպետք է դրանց վրա ընկնի։ «Գազելները» լցվել են քաղաքի փողոցները եւ կանգառները։ «Իսկ էլեկտրական տրանսպորտը նախկինի պես անտեսված վիճակում է։ Խոսքը տրոլեյբուսների մասին է, որոնք կարող էին ուղեւորներին ավելի հարմարավետ տեղափոխել»,- հավելեց նա։