Հայաստանի իշխանությունները կարծում են, որ հիմա ԼՂՀ անկախության ճանաչման պահը չէ, ամեն ինչ պետք է արվի իր ժամանակին: Այս մասին, այսօր՝ մայիսի 6-ին, լրագրողների հետ հանդիպման ժամանակ նշել է ՀՀԿ խմբակցության պատգամավոր Սամվել Նիկոյանը:
Հարցին, թե երբ է գալու ժամանակը, Նիկոյանը պատասխանել է. «Երբ Ադրբեջանը հաջորդ ռազմական գործողությունները սկսի, համանախագահող երկրների համար միանշանակ կլինի, որ պետք է ճանաչենք Արցախի անկախությունը»:
Նրա խոսքով, Մինսկի խմբից դժգոհություններ ունենալով հանդերձ, մենք հասկանում ենք, որ դա այն ձեւաչափն է, որով պետք է շարունակենք բանակցությունները: «Մինսկի խմբի այլընտրանքը ոչ թե քառօրյա պատերազմն է, այլ ավելի երկարատեւ: Եթե հիշում եք, ԼՂՀ անկախությունը ճանաչելու վերաբերյալ ասվել է՝ եթե Ադրբեջանը վերսկսի ռազմական գործողությունները, Հայաստանը կճանաչի Արցախի անկախությունը»,-ասել է պատգամավորը:
Նա ընդգծել է, որ նախօրեին Կառավարությունը ձեռնպահ մնաց դրական եզրակացություն տալ ԼՂՀ անկախության ճանաչման օրինագծին, միայն հաստատվեց, որ այդ որոշումը կկայացվի այն ժամանակ, երբ անհրաժեշտ պահը գա: Պատգամավորի խոսքով, Արցախի ճանաչման մասին օրինագիծը քննարկվելու է ԱԺ լիագումար նիստում՝ անկախ կառավարության եզրակացությունից:
Նշենք, որ կառավարությունը մայիսի 5-ի նիստում հավանություն տվեց Ազգային ժողովի պատգամավորներ Զարուհի Փոստանջյանի եւ Հրանտ Բագրատյանի՝ օրենսդրական նախաձեռնության կարգով ներկայացրած «Արցախի Հանրապետությունը ճանաչելու մասին» ՀՀ օրենքի նախագծի վերաբերյալ կառավարության եզրակացության նախագծին: