Թուրքիայի վարչապետ Ահմեդ Դավութօղլուն հեռացվեց պալատական հեղաշրջման արդյունքում։ Նման տեսակետ, այսօր՝ մայիսի 6-ին, լրագրողների հետ զրույցում հայտնեց թուրքագետ Անդրանիկ Իսպիրյանը։
Իսպիրյանի խոսքերով՝ Թուրքիայի նախագահ Ռեջեփ Թայիփ Էրդողանի եւ վարչապետ Ահմեդ Դավութօղլուի միջեւ երկար ժամանակ հակասություններ եղել են, ինչն էլ Դավութօղլուին հեռացնելու գլխավոր պատճառն է։
«Էրդողանը Դավութօղլուին նշանակել էր որպես ձեւական վարչապետ աշխատելու, սակայն Դավութօղլուն փորձեց իրոք վարչապետ զգալ եւ լինել վարչապետ, ինչն էլ չներեց Էրդողանը։ Թուրքիայում տեղի ունեցավ պալատական հեղաշրջում, ինչի հետեւանքով հեռացվեց իշխող կուսակցության առաջնորդ ու վարչապետ Ահմեդ Դավութօղլուն։ Հեղաշրջումը տեղի ունեցավ 2 փուլով՝ ապրիլի 29-ին, երբ կուսակցության ղեկավար խորհրդում նրանից վերցվեց նահանգների ու շրջանների գրասենյակների նախագահներ նշանակելու իրավասությունը, եւ մայիսի 4-ին, երբ Դավութօղլուն գնաց Էրդողանի պալատ, եւ այնտեղ էլ արդեն հեռացվեց»,-նշեց Իսպիրյանը։
Թուրքագետի խոսքով՝ եթե Թուրքիայում 1997-ի հեղաշրջում ստացել էր «պոստ մոդեռն» հեղաշրջում, ապա այս հեղաշրջումն արդեն շրջանառվում է հումորային «դոստ մոդեռն» անունով, քանի որ իր ընկերներն իր դեմ հեղաշրջում արեցին։
«Ներկայում Թուրքիայի ներքին ու արտաքին քաղաքականության մեջ իրավիճակին բացառապես տիրապետելու է Էրդողանը, ինչն ավելի անկանխատեսելի է դարձնում Թուրքիան։ Դավութօղլուն շատ ավելի մեղմ էր։ Էրդողանի կոպիտ քաղաքականությունն ու սխալները փորձում էր իր դիվանագիտությամբ մեղմել»,-ասաց Իսպիրյանը։
