Եթե Իսպանիան 16 հազար փախստականների չընդունի Հունաստանից ու Իտալիայից, ինչպես մինչ այդ էր խոստացել, ապա ստիպված կլինի 4 մլրդ եվրո տուգանք վճարել, հայտնում է ՏԱՍՍ-ը:
Սա նշանակում է, որ 46 միլիոն բնակչությամբ թագավորության յուրաքանչյուր հպատակ Բրյուսելին մոտավորապես 85 եվրո «կվճարի»:
Անցած տարվա սեպտեմբերին ԵՄ անդամ երկրների հանդիպման ժամանակ Իսպանիայի իշխանությունները խոստացել են 2016-ին ավելի քան 8 հազար փախստական ընդունել: 2017-ին էլ Մադրիդը պետք է նույնքան փախստական ընդունի: Այդուհանդերձ, այս պահին Իսպանիան ընդամենը 18 մարդու է ընդունել:
ԵՀ-ն ԵՄ երկրների համար նախատեսում է նաեւ միգրանտների ընդունելությունից հրաժարվելու հնարավորություն: «Այն պետությունները, որոնք հրաժարվել են քվոտաներով փախստականներ ընդունել, պետք է 250 հազար եվրո վճարեն յուրաքանչյուր միգրանտի համար այն երկրին, որը նրան կընդունի»,- ասել է Ֆրանս Թիմերմանսը՝ ԵՀ ղեկավարի առաջին տեղակալը:
Իսպանիայի կառավարությունը պնդում է, որ գործընթացը ձգձգվում է տարբեր գերատեսչությունների միջեւ բարդ համակարգման պատճառով: Բացի դրանից Մադրիդը համարում է, որ փախստականների ընդունման ամենակարեւոր տարրերից մեկը անվտանգությունն է, դրա համար էլ մտադիր է մանրակրկիտ ստուգել բոլոր միգրանտներին, որոնց ծրագրում է ընդունել այս տարի: