Եթե հայկական կողմը որոշում կայացնի ճանաչել Ղարաբաղի անկախությունը, այդ մասին հասարակությունը կիմանա: Այդ մասին լրագրողներին մայիսի 6-ին ասել է հանրապետական Խոսրով Հարությունյանը:
Նրա խոսքով, մինչեւ նման որոշում կայացնելը նախագահը, լինելով հուսալի գործընկեր, այդ մասին կհայտնի իր գործընկերներին, առաջին հերթին ԵԱՀԿ Մինսկի խմբի համանախագահ երկրներին: Սակայն դա չի նշանակում, որ Հայաստանի նախագահը առաջնորդվելու է նրանց խորհուրդներով:,Նա կկայացնի որոշում, կհայտնի նրանց, իսկ հետո կիրականացնի այն: Հիմա եկեք մտածենք, ի՞նչ կարող է կատարվել, եթե մենք հիմա ճանաչենք Ղարաբաղը: Ի՞նչ կշահենք մենք բանակցային գործընթացում: Ու ինչո՞ւ ենք մենք կարծում, որ Հայաստանի կողմից ճանաչումից հետո աշխարհով մեկ սկսվելու է ճանաչումների հիթ շքերթ: Նույնիսկ Կոսովոն, որի ստեղծումը ձեռնտու էր մի շարք ուժերի, ամբողջ աշխարհը չի ճանաչել»,- նկատեց Հարությունյանը: Հայաստանի համար նրա խոսքով առաջնահերթ խնդիր է մնում ԼՂՀ անվտանգության ապահովումը: «Այսօր մենք ոչ մի վայրկյան չենք կասկածում, որ ռազմական գոծողությունների վերսկսման հավանականությունը շատ մեծ է: Բայց նույնիսկ այդ դեպքում պետք է ձեռնարկվեն քայլեր, որոնք ողջամիտ վարքագծի դեպքում կարող էին զսպել հակառակորդին»,- նշել է Հարությունյանը:
«Ժառանգություն» կուսակցության կառավարման նախագահի տեղակալ Արմեն Մարտիրոսյանն էլ դրան ի պատասխաան ասել է, որ Ղարաբաղի շուրջ բանակցային գործընթացով է պայմանավորված միջազգային համայնքի այդաստիճան հանդուրժողական վերաբերմունքը Հայաստանում տարիներ շարունակ անցկացվող ոչ լեգիտիմ ընտրությունների նկատմամբ: «Եթե հանգամանքները այլ լինեին՝ նրանք վաղուց կասեին՝ ընտրությունները անօրինական են եղել, ազատեք ձեր պաշտոնները: Բայց նրանք չեն ցանկանում դա՝ ցանկանալով Հայաստանին պահպանել որպես սուբյեկտ ղարաբաղյան բանակցություններում»,- հավելել է Մարտիրոսյանը: