Ընտրությունների ժամանակ մատնահետք թողնելու կարգը հստակ սահմանված է. նախ աջ ձեռքի ցուցամատն ես դնում սարքին, եթե չկա, ապա` ձախ ձեռքինը, բայց դժվար է պատկերացնել տասը մատի մատնահետք թողնելը: Այս մասին NEWS.am-ի հետ զրույցում ասաց ԱԺ պետաիրավական հանձնաժողովի ղեկավար Հովհաննես Սահակյանն` անդրադառնալով 10 մատը թանաքոտելու վերաբերյալ ՀԱԿ-ի առաջարկին:
«Իմ պատկերացմամբ` պրակտիկորեն սա գրեթե անհնար է եւ դժվար իրականանալի, որովհետեւ եթե փորձենք զուտ խրոնոմետրաժ անենք եւ փորձենք ինչ ժամանակահատվածում քաղաքացին կարող է տասը մատնահետքը թողնել, ապա քվեաթերթիկ վերցնել ընտրությունը իրականացնել եւ դուրս գալ, այդ 12 ժամը, որ հատկացված է ընտրությունները կազմակերպելու համար, չի բավարարի եւ լրացուցիչ խնդիրներ կառաջացնի»,- ասաց Հովհաննես Սահակյանը:
Ըստ պատգամավորի` այդ առաջարկով ՀԱԿ-ը փորձում է կանխել այլ մատով ուրիշ տեղամասում երկրորդ անգամ քվեարկությունը,. «Սակայն եթե համադրում ենք մատնահետք թողնելու փաստն ու էլեկտրոնային սարքերը , գրեթե անհնար է դառնում, որ տարբեր մատներով բազմակի քվեարկություն կատարելու մտահոգությունը իրագործվի»,-նշեց պատգամավորը: