Agusta AW139 ուղղաթիռը, որով Ուկրաինայի նախկին նախագահ Վիկտոր Յանուկովիչը «Մեժիգորիեի» նստավայրից մեկնում էր Կիեւի կենտրոն աշխատանքի, վաճառքի է հանվել։ Այս մասին են վկայում միջազգային ավիաբրոքերների տվյալները։ Ուղղաթիռի վաճառքով զբաղվում է 2 ընկերություն. Շվեյցարիայում գրանցված Sparfell & Partners-ը եւ ամերիկյան SkyQuest International-ը։ Մեքենայի արժեքը նշված չէ, փոխանցում է Gazeta-ն։

Շվեյցարական Sparfell & Partners-ի կայքում մանրամասն նկարագրված է ուղղաթիռը։

Մասնավորապես ինտերիերի նկարագրության մեջ ասվում է, որ ուղղաթիռը նախատեսված է 6 ուղեւորի համար, երկու կաշվե աթոռները VVIP կոմպլեկտ են։ Կա ժամանցի կենտրոն՝ սենսորային դիսփլեյով, CD, DVD նվագարկիչով, արբանյակային ռադիոյով, 8 բարձրախոս, 2 մոնիտոր եւ  հանգստի անկյուն՝ անհատական նախագծով, արբանյակային հեռախոս։ Սրահը մշակվել է աղմուկը նվազագույնի հասցնելու հաշվարկով։

Agusta AW139 VIP-ը արտադրվել է 2008-ին։