Լեհաստանը երբեք չի համաձայնի փախստականների ուժային վերատեղակայման եւ մարդկանց հարկադիր տեղահանման, որովհետեւ դա հակասում է մարդու իրավունքներին, ուրբաթ հայտնել է նախագահի գրասենյակի քարտուղար, պետության ղեկավարի միջազգային հարցերով խորհրդական Քշիշտոֆ Շչերսկին ի պատասխան այն հարցին, թե ինչպես է գնահատում Եվրահանձնաժողովի առաջարկած` ԵՄ-ի միգրացիոն քաղաքականության բարեփոխումը, հայտնում է «ՌԻԱ Նովոստին»:
Ավելի վաղ չորեքշաբթի Եվրահանձնաժողովը ԵՄ-ի անդամ երկրներին, որոնք հրաժարվում են ըստ քվոտաների փախստականներ ընդունել, առաջարկել է յուրաքանչյուր միգրանտի համար 250 հազար եվրո վճարել այն պետությանը, որը կընդունի նրան, ասված է ԵՀ-ի հաղորդագրության մեջ:
Մեկնաբանելով ԵՀ-ի առաջարկը` Շչերսկին հիշեցրել է Լեհաստանի նախագահ Անջեյ Դուդայի հայտարարությունը, որն ընդգծում էր, որ միգրանտներին օգնությունը պիտի հենվի երկու կետի վրա` համերաշխություն մարդկանց հետ, որոնք սպառնալիքի տակ են հայտնվել իրենց երկրում զինված հակամարտությունների պատճառով եւ մարդու իրավունքների նկատմամբ հարգանքի: Շչերսկին ընդգծել է, որ յուրաքանչյուր մարդու հիմնարար իրավունքն է ինքնուրույն հաստատվել իր ընտրած վայրում:
«Ոչ մեկին ստիպողաբար չենք պահի Լեհաստանում: Լեհաստանը երբեք չի համաձայնի նման վերատեղակայում կատարել` մարդկանց հարկադրական վերաբնակեցում միայն նրան համար, որ նրանց որպես փախստական է ճանաչում… Լեհաստանում հարկադրական ճամբարներ չեն լինի, չի լինի հարկադրական վերատեղակայում, որովհետեւ դա հակասում է մարդու իրավունքներին», — Շչերսկու հայտարարությունն է մեկնաբանում PAP լրատվական գործակալությունը:
Նրա խոսքով, արհեստական մեխանիզմները, վարչական կարգավորումը տուգանքների եւ պատիժների օգտագործմամբ չեն լուծի փախստականների հարցում մարդասիրական իրավիճակը:
Եվրոպան Երկրորդ համաշխարհային պատերազմի ժամանակներից ի վեր մեծագույն ճգնաժամն է ապրում, որն առաջին հերթին առաջացել է Մերձավոր Արեւելքի եւ Հյուսիսային Աֆրիկայի երկրներում մի շարք զինված հակամարտությունների եւ տնտեսական խնդիրների պատճառով: ԵՄ-ի Frontex գործակալության տվյալներով, 2015-ին Եվրամիություն է եկել 1,8 մլն միգրանտ:
