Լեհական գյուղացիական կուսակցության առաջնորդ Վլադիսլավ Կոսինյակ-Կամիշը հայտարարել է, որ հարկավոր է զինել փախստականներին եւ ուղարկել պայքարել հայրենիքի ազատության համար:
«Մենք պետք է, մարդասիրական նկատառումներից ելնելով, ընդունենք կանանց եւ երեխաներին, եթե նման անհրաժեշտություն լինի, նման կոչ է անում նաեւ Սրբազան հայրը (Հռոմի Ֆրանցիսկոս պապը): Իսկ տղամարդկանց հարկավոր է զինել եւ ուղարկել իրենց երկրի ազատության համար պայքարելու»,- հայտարարել է նա:
Ըստ Gazeta-ի, նա նաեւ հավելել է, որ Լեհաստանը երբեք չի համաձայնի փախստականների ավտոմատ տեղաբաշխմանը:
Ավելի վաղ այդ երկրի վարչապետ Բեատա Շիդլոն հայտարարել էր, որ երկիրը ցանկանում է ակտիվ մասնակցություն ունենալ Եվրոպայում միգրացիոն ճգնաժամի հետ կապված խնդիրների լուծմանը:
