Այս օրերին հայ-ադրբեջանական սահմանի Նախիջեւանի հատվածում հակառակորդը զինտեխնիկա է կուտակել՝ լրագրողներին ասել է Կորյուն Նահապետյանը: ԱԺ Պաշտպանության, ազգային անվտանգության եւ ներքին գործերի հանձնաժողովի նախագահը միաժամանակ վստահեցրել է, որ իրավիճակը վերահսկելի է, հայկական զինված ուժերը պատրաստ են ցանկացած հարձակում դիմագրավել: Երբ վերջապես Հայաստան կհասնի ռուսական 200 մլն դոլարի վարկով ձեռք բերված սպառազինությունը: Կորյուն Նահապետյանը հստակ ժամկետներ չի նշել, միայն ասել է՝ ամեն ինչ արվում է համաձայնագրով նախատեսված ընթացակարգերով:
Կորյուն Նահապետյանի ղեկավարած հանձնաժողովն այսօր որոշել է հետաձգել քննարկումները Թեւան Պողոսյանի եւ Ռուբիկ Հակոբյանի առաջարկած նախագծի շուրջ, որով առաջարկվում է 18 տարին լրացած բոլոր տղաներին բանակ զորակոչել: Հետաձգումը բացատրել են նրանով, որ 10 օրից կառավարությունը ԱԺ է բերելու «Զինապարտության մասին» օրենքում փոփոխությունների իր նախագիծը:
Ախուրյանի հիվանդանոցում այսօր ծնվել է Թալիշում զոհված Հրաչ Գալստյանի առաջնեկը: Աղջկան անվանել են Անահիտ, ինչպես հայրն էր ցանկացել: 25-ամյա Հրաչն իր ապագա կնոջը հանդիպել ու սիրահարվել էր Արցախի Թալիշ գյուղում: Անուշը դեռ դպրոցական էր, երբ գյումրեցի Հրաչը, որը նոր էր ավարտել Վազգեն Սարգսյանի անվան ռազմական ինստիտուտը, ծառայության էր անցել Թալիշում: Անուշի Վերջին զանգի օրն էլ նշանադրվել են: Ապրիլի 2-ին Հրաչն իր կնոջն ու նրա հարազատներին հանել էր Թալիշից, ինքը մեկնել մարտադաշտ, զոհվել էր մեկ օր անց՝ ապրիլի 3-ին:
Ազգային ժողովի պատգամավորից դրամ շորթելու կասկածանքով ձերբակալված՝ Analitik.am կայքի տնօրեն Անի Հովհաննիսյանն ու նրա օգնական Վարդիթեր Գիշյանը երկու ամսով կալանավորվել են: Նրանց փաստաբանները ասել են, որ բողոքարկելու են դատարանի որոշումը: Հիշեցնենք, որ ոստիկանություն հաղորդում էր տվել պատգամավոր Տիգրան Ուրիխանյանը, որից գումարը ստանալու պահին էլ ձերբայալվել էր տնօրենի օգականը, ավելի ուշ նաեւ՝ կայքի տնօրենը: Ըստ հաղորդման՝ Անի Հովհաննիսյանը ամսական 300 հազար դրամ էր պահանջել պատգամավորից՝ նրա եւ նրա ընտանիքի վերաբերյալ կեղծ տեղեկություններ չհրապարակելու համար:
Ավետիսյանների սպանության համար մեղադրվող Վալերի Պերմյակովին ձերբակալելուց հետո ռուսական սահմանապահ ջոկատ տեղափոխելիս ներկա է եղել Շիրակի նախկին ոստիկանապետ Վարդան Նադարյանը: Տուժածների իրավահաջորդների ներկայացուցիչ Լուսինե Սահակյանը այսօր դատարանին միջնորդել է վկայություն տալու կանչել նախկին ոստիկանապետին: Նրան հարցաքննելը կարեւոր է՝ հասկանալու համար՝ արդյոք նա փորձել է արել հասնել նրան, որ Պերմյակովին հանձնեն հայկական կողմին, եւ ինչու է ռուս զինծառայողը անարգել հայտնվել ռուսական կողմի մոտ: Չնայած դատապաշտպանի համոզիչ փաստարկներին՝ դատավորը մերժել է միջնորդությունը՝ ասելով, որ դա չի վերաբերվում մեղադրանքի բովանդակությանը:
Վլադիմիր Գասպարյանը թմրամոլությունից պատանիներին զերծ պահելու համար ծնողներին կոչ է անում ամենօրյա խիստ հսկողության տակ պահել իրենց երեխաներին: Ոստիկանապետը հիշեցրել է՝ որեւէ մեկն այդ վտանգից ապահովագրված չէ:
Իվետա Մուկուչյանը երկրորդ փորձն է արել Եվրատեսիլի բեմին: Երգչուհու առաջին փորձն իրարանցում էր առաջացրել համացանցում: Մինչ միջազգային լրագրողները Իվետայի ելույթը լավագույնն էին գնահատել, Հայաստանում գտնեցին մարդիկ, ովքեր որոշեցին՝ հայ աղջկան հարիր չէ բեմին ցուցադրել իր գեղեցիկ մարմինը: Երգչուհու զգեստի հեղինակը հայտարարեց, որ Իվետան մեկ այլ հագուստով է ներկայանալու մրցույթին: Քննադատողների ուրախությունը երկար չտեւեց՝ երկրորդ փորձից պարզ դարձավ, որ կիսաեզրափակիչում Իվետան ներկայանալու է նույն ոճի, սակայն ավելի շքեղ ու բեմական հագուստով։ Ի դեպ, Եվրատեսիլի կազմակերպիչները մեղմացրել են իրենց դիրքորոշումը դրոշների հարցում: Այսօր հայտարարել են, որ մրցույթին թույլատրվում են բոլոր երկրների դրոշները, այդ թվում՝ Արցախի:
Մեր օրերի Ռոբինզոնը: Բեռնանավի անձնակազմը փրկել է ավելի քան երկու ամիս բաց ծովում անցկացրած նավաստուն: 29-ամյա տղամարդը երեք ընկերների հետ նավաով դուրս էր եկել ծով, շարժիչը ձչացել է, չորսից փրկվել է միայն ինքը: Երկու ամիս նա անցկացրել է բաց ծովում, սնվել ձկով եւ ծովային ճայերով, մինչեւ նրան Հավայան կղզիներից մոտ չորս հազար կմ հեռավորության վրա պատահաբար գտել է բեռնանավի անձնակազմը:
Դոլարի ու ռուբլու փոխարժեքները նվազել են, եվրոյինն ու ֆունտինը՝ աճել: Այսպիսով դոլարի փոխարժեքը կազմել է 478, եվրոյինը ՝ 547, ֆունտինը՝ 694, իսկ ռուբլունը՝ 7.23 դրամ:
Առաջիկա գիշեր Երևանում սպասվում է մինչև 12 , իսկ վաղը ցերեկը՝ մինչև 24 աստիճան տաքություն: Հնարավոր է կարճատև անձրև: