Արցախի Մարտունու շրջանի Մարտունի քաղաքում կյանքը շարունակվում է բնականոն հունով: Քաղաքում գործում են դպրոցները, մանկապարտեզը, պետական բոլոր հիմնարկները, սպասարկման կետերը:
Բակերում աշխուժություն կա: Երեխաները խաղում են, կանայք ու ծերերը բակերում հավաքված զրուցում: Ճիշտ է՝ զրույցի հիմնական թեման շփման գծի վիճակն է, բայց կենցաղային հարցերն էլ չեն մոռանում:
Ապրիլյան պատերազմի օրերին Մարտունի քաղաքից երեք զինծառայող է զոհվել: Այս քաղաքի ուղղությամբ ադրբեջանական կողմը կրակել է ապրիլի առաջին օրերին, արկերից մեկն ընկել էր քաղաքի գերեզմանատանը, իսկ մյուսը` բնակիչներից մեկի տան ուղղությամբ: Դրանից հետո քաղաքի ուղղությամբ կրակոցներ չեն եղել:
Մարտունեցիները հպարտությամբ ասում են՝ 90-ականներին էլ իրենց շրջանը ամենապաշտպանվածներից է եղել, այսօր էլ վստահ են, որ սահմանին գտնվող իրենց որդիներն ու ամուսինները անառիկ կպահեն իրենց քաղաքը:
Մարտունեցիները ասում են՝ իրենք ոչ 1990-ականներին են լքել քաղաքը, ոչ էլ այսօր են պատրաստվում:
«Կռվող զինվորը պիտի իմանա, որ իրեն սպասում են: Ինչի փախչեմ, ես էս տանը կմնամ»,- NEWS.am-ի հետ զրույցում ասաց քաղաքի բնակչուհիներից մեկը:
Մարտունեցիները, որոնք տարիներ շարունակ ապրել են ադրբեջանցիների հետ կողք կողքի, նշում են, որ ադրբեջանցին վախկոտ է:
«Թուրքը մեր քաղաքը չի մտնի: Էն ժամանակ չի մտել ու հիմա էլ չի մտնի»,- ասում են նրանք: