Հայաստանի իշխանությունները վախենում են բացել բյուջետային ծախսերի ստուգումները՝ վախենալով բուռն բողոքներից։ Այս մասին մայիսի 18-ին խորհրդարանում ասել է ՀԱԿ խմբակցության ղեկավար Լեւոն Զուրաբյանը։
Նրա խոսքով՝ դեռ 2008-ի հաշվետվության մեջ Վերահսկիչ պալատը հայտնել էր, որ ստուգել է պետական բյուջեի ծախսերի 4 տոկոսը եւ 8 մլրդ դրամի խախտում էր հայտնաբերել։ Ուսումնասիրելով բոլոր ծախսերը՝ կարելի է ենթադրել, որ գողացել են 500 մլն դոլար։ 2012-ին Վերահսկիչ պալատի հաշվետվությունից կարելի էր եզրակացնել, որ 700 մլրդ դրամի կոռուպցիոն ռիսկեր կան։ Իսկ 2013-ին Վերահսկիչ պալատն արդեն չներկայացրեց ընդհանուր գնահատական՝ գնահատելով միայն առանձին ոլորտները։ Բայց ՀԱԿ-ը ինքն է հաշվարկ արել՝ ստանալով 144 մլն դոլարի խախտում պետական ծախսերի 15-20 տոկոսի դեպքում։ Այսինքն՝ ընդհանուր առմամբ ծախսերը կարող էին հասնել մինչեւ 600 մլն դոլար։ «Հիմա Վերահսկիչ պալատը հասել է նրան, որ մի շարք խախտումներով առհասարակ թիվ չի ներկայացրել։ Եվ պարզել, թե պաշտոնյաները որքան են թալանել անցյալ տարի, չի ստացվի։ Իշխանություններն արել են ամեն բան, որպեսզի Վերահսկիչ պալատի հաշվետվությունները հնարավորինս անմեղ թվան եւ բուռն բողոքներ առաջ չբերեն, չէ՞ որ հենց դրանից էլ նրանք վախենում են»։