Հայերի կոտորածները «ցեղասպանություն» ճանաչող բանաձեւը սատարելով՝ Բունդեսթագի պատգամավորները կարող են զայրացնել Թուրքիայի նախագահ Ռեջեփ Թայիփ Էրդողանին, ինչպես նաեւ վտանգի տալ դնել Եվրամիության հետ միգրացիոն գործարքը: Այս մասին գրում է Reuters գործակալությունը:
Ըստ հոդվածի, քվեարկությունն անցկացվելու է զգայուն պահի, երբ Գերմանիայի կանցլեր Անգելա Մերկելը ձգտում է, որպեսզի Էրդողանը պահպանի միգրանտների հարցով գործարքի իրականացմանը հավատարմությունը:
Քննադատները Մերկելին մեղադրում են Թուրքիայում մարդու իրավունքների հետ կապված իրավիճակի շուրջ մեղմ դիրքորոշման մեջ, քանի որ նա հուսահատորեն ձգտում է կանգնեցնել միգրանտների հոսքը Գերմանիա: Մերկելը նաեւ քննադատության է արժանացել՝ դատարանին թույլ տալով առաջ շարժվել Էրդողանի մասին բանաստեղծություն գրած երգիծաբանի նկատմամբ հետաքննության գործում:
Պահպանողական Ֆրանց Ջոզեֆ Յունգի խոսքով, «ցեղասպանություն» եզրույթը կլինի ինչպես բանաձեւի վերնագրում, այնպես էլ տեքստում:
«Մենք ցանկանում ենք ներդրում ունենալ հաշտեցման գործում, բայց կարծում եմ, որ ցանկանում ենք նաեւ ճիշտ նկարագրել պատմական փաստը»,- Deutschlandfunk ռադիոկայանի հետ զրույցում հայտարարել է նա՝ հավելելով, որ դա կապված չէ միգրացիոն գործարքի հետ:
Հոդվածի հեղինակների խոսքով, նաեւ մտավախություն կա, որ բանաձեւը կարող է լարվածություն առաջացնել Գերմանիայի 3.5 միլիոնանոց թուրքական համայնքի հետ:
