Այս տարվա մարտին Moody’s վարկանիշային կազմակերպության կողմից Հայաստանի վարկանիշը BA3-ից 1 կետով իջեցնելը կապված էր ԵՏՄ համագործակցության ներքո Հայաստանի մյուս գործընկեր երկրներում իրադրության վատթարացման հետ: Այս մասին, այսօր՝ մայիսի 19-ին, ԱԺ նիստում Կենտրոնական բանկի 2015 թ-ի դրամավարկային քաղաքականության ծրագրի կատարման հաշվետվության քննարկման ժամանակ հայտարարել է ԿԲ նախագահ Արթուր Ջավադյանը:
Անդրադառնալով հարցին, թե ինչպես են միջազգային շուկաներն արձագանքել ապրիլի սկզբի ԼՂՀ դեմ Ադրբեջանի ագրեսիային, Ջավադյանը նշել է, որ դրա լավագույն պատկերը մշտապես լինում են մեր եվրոպարտատոմսերի հետ կատարվող փոփոխությունները: «Դա որեւէ կերպով չանդրադարձավ եվրոպարտատոմսերի վրա, հակառակը` շտկվեց իրավիճակը»,- ընդգծեց ԿԲ նախագահը:
Նրա խոսքով, այդ իրադրությունը լուրջ բացասական ազդեցություն ունեցավ Թուրքիայի պարտատոմսերի եւ Ադրբեջանի պարտատոմսերի վրա: