Ղարաբաղի խնդիրը ռազմական լուծում չունի. տարածաշրջանային շահերի եւ ապակառուցողական նկրտումների փոխարեն առաջին տեղում պետք է լինեն մարդու իրավունքներն ու ազգերի ինքնորոշման իրավունքը։ Այս մասին մայիսի 19-ին՝ Երեւանում կայացած մամուլի ասուլիսի ժամանակ, ասել է Համբուրգի խորհրդարանի պատգամավոր, Գերմանիայի «Ձախեր» կուսակցության անդամ Մարդին Դոլցերը։
«Ազգերի ինքնորոշման իրավունքը միջազգային օրենքներով հաստատված է, դրանում ոչ մի կասկած։ Այլ խնդիր է, Լեռնային Ղարաբաղի դեպքում այդ հարցը լուսաբանված չէ։ Մենք խնդիր ունենք այդ մասին տեղեկություն տարածել, ներկայացնել խնդիրը, որպեսզի մարդկանց մոտ կարծիք ձեւավորվի։ Սա գործընթաց է, որը մենք ցանկանում ենք առաջ տանել»,- ասել է պատգամավորը՝ հավելելով, որ Ղարաբաղը հայաբնակ տարածք է, ուստի հայկական է։
«Մենք տեսանք հայկական պետություն, հայաբնակ։ Կարծում ենք, որ խնդրին պետք է լուծում տրվի բոլոր կողմերի մասնակցությամբ»,- իր հերթին ասաց Գերմանիայի Բունդեսթագի «Ձախեր» խմբակցության պատգամավոր Ուլլա Յելփքեն։