Ռուսաստանի եւ Հայաստանի հարաբերությունները դաշնակցային են, իսկ Ադրբեջանի հետ հարաբերությունների դաշնակիցների հարաբերություններ չեն, մենք դրանք բնութագրում ենք որպես ռազմավարական գործընկերություն։ Այս մասին Մոսկվայում հայ լրագրողների հետ զրույցում ասել է ՌԴ ԱԳՆ ԱՊՀ երկրների 4-րդ դեպարտամենտի տնօրեն Ալեքսեյ Պավլովսկին։
«Երկու բառն էլ լրիվ հասկանալի են։ Գործընկերություն նշանակում է, որ մենք համագործակցում ենք, ռազմավարական նշանակում է, որ համագործակցությունը երկարաժամկետ բնույթ է կրում։ Ռուս-ադրբեջանական հարաբերությունների հիմքում ընկած օբյեկտիվ գործոններն հասկանալի են՝ աշխարհագրական մոտ դիրք, տնտեսական կապեր, Ռուսաստանում առկա մեծ ադրբեջանական սփյուռք. մենք դա կոչում ենք ռազմավարական գործընկերություն։ Ադրբեջանը, ի տարբերություն Հայաստանի, Ռուսաստանի դաշնակիցը չէ, Հայաստանի հետ մենք ռազմա-քաղաքական միություն ունենք, փոխօգնության մասին մի շարք պայմանագրեր, այդ թվում՝ ռազմական»,- նշել է Պավլովսկին։
Դիվանագետի խոսքով՝ հենց դրանում է տարբերությունը, եւ խոսել այն մասին, որ Հայաստանի եւ Ադրբեջանի հետ հարաբերությունները դիտարկվում են նույն մակարդակի վրա, այնքան էլ ճիշտ չէ։ «Իհարկե, քչերն են խորանում նման դետալների մեջ, որոնք շատ կարեւոր են»,- ասել է Պավլովսկին Ռուսաստանի փոխվարչապետ Դմիտրի Ռոգոզինի այն հայտարարության ենթատեքստում, թե Ադրբեջանը Ռուսաստանի ռազմավարական գործընկերն է, որը միանշանական չէր ընկալվել հայ հանրության շրջանում։
