Ռուս-թուրքական հարաբերություններում ճգնաժամը վաղուց էր հասունանում, սակայն առաջ նախընտրում էին խնդիրները չհրապարակայնացնել։ Այս մասին Մոսկվայում հայ լրագրողների հետ զրույցում ասել է ՌԴ ԱԳՆ ԱՊՀ երկրների 4-րդ դեպարտամենտի տնօրեն Ալեքսեյ Պավլովսկին՝ հավելելով, որ տարաձայնությունները հասունանում էին, իսկ ճշմարտության պահը վրա հասավ, երբ խոցվեց ռուսական կործանիչը։

Նրա խոսքով՝ այս պահին Թուրքիայի ակտիվությունը նկատվում է ոչ միայն Հարավային Կովկասում, այլ նաեւ մի շարք միջազգային կազմակերպություններում։ Ընդ որում, Թուրքիայի ակտիվությունն ունի հակառուսական ուղղվածություն։ Միաժամանակ դիվանագետը նշեց, որ Ռուսաստանը ստեղծված ճգնաժամային իրավիճակում չի մեղադրում թուրք ժողովրդին կամ  Թուրքիային՝ որպես պետության։ «Այդ ճգնաժամը ծնվել է Թուրքիայի ներկայիս ղեկավարության անպատասխանատու պահվածքի պատճառով։ Թուրքիայի ղեկավարությունը կորցրել է իրականության զգացումը, ինչը, առաջին հերթին, վատ է հենց Թուրքիայի համար»,- ասել է Ալեքսեյ Պավլովսկին։