Հայաստանի եւ Ուկրաինայի միջեւ օդային հաղորդակցման սահմանափակումների ամբողջական չեղարկմամբ չեն բացառվում սակագների փոփոխությունները: Այս մասին NEWS.am-ի թղթակցին ասաց ՀՀ էկոնոմիկայի նախարարության քաղաքացիական ավիացիայի քաղաքականության եւ տնտեսական կարգավորման վարչության պետ Աննա Չոբանյանը:
«Եթե մի ոլորտում սահմանափակումները վերանում են, դա բերում է ակտիվության: Այս դեպքում երբ մեկից ավելի ավիաընկերություն կարող է սպասարկել չվերթները. հնարավոր է՝ սակագների իջեցում լինի: Այժմ տեսնենք, թե հայկական եւ ուկրաինական ավիաընկերություններն ինչպես կօգտվեն այս հնարավորություններից»,- ասաց Աննա Չոբանյանը:
Ըստ նախարարության պաշտոնյայի՝ մինչեւ նոր պայմանավորվածության ձեռք բերումը՝ երկու կողմերն ունեին հաճախականության թույլատրելիության, ավիաընկերությունների կողմից շահագործվող երթուղիների, նշանակման քանակի սահմանափակումներ: Սրանց չեղարկումից հետո ավիաընկերությունները կարող են շահագործել երթուղիներն այնքան հաճախականությամբ, ինչքան կցանկանան:
«Նախկինում շաբաթական երեք չվերթ էին իրականացնում: Բացի դրանից, ավիաընկերությունների նշանակման քանակի սահմանափակումներն են վերացվել: Սա նշանակում է՝ ինչքան ավիաընկերություն մենք ուզենք, կնշանակենք եւ հակառակը: Օրինակ, հայկական կողմն ունի երկու ավիաընկերություն, որոնք երկուսն էլ կարող են թռիչքներ իրականացնել դեպի Ուկրաինա: Նույնն էլ ուկրաինական ավիաընկերություններին է վերաբերում»,- ասաց Աննա Չոբանյանը:
