Լեռնային Ղարաբաղի մասնակցությունը բանակցություններին հրամայական է, բայց այդ մասնակցությունը պետք է համընդգրկուն լինի: Այդ մասին NEWS.am-ի թղթակցի հետ զրույցում հայտնել է Լեռնային Ղարաբաղի Հանրապետության նախագահի մամուլի քարտուղար Դավիթ Բաբայանը` անդրադառնալով ԵԱՀԿ-ի Մինսկի խմբի ռուսաստանցի համանախագահ Իգոր Պոպովի վերջին հայտարարությանը` Լեռնային Ղարաբաղի` բանակցությունների սեղանի շուրջ վերադառնալու անհրաժեշտության հետ կապված:
Դավիթ Բաբայանի խոսքով, ԵԱՀԿ-ի Մինսկի խմբի համանախագահներն առաջին անգամ են հանդես գալիս նման հայտարարությամբ: «Այդ հայտարարություններով նրանք եւս մեկ անգամ ընդգծում են, որ առանց Լեռնային Ղարաբաղի, անհնար է կարգավորել խնդիրը, եւ դա տրամաբանական է», - ընդգծել է ԼՂՀ նախագահի մամուլի քարտուղարը:
Դավիթ Բաբայանը նաեւ հավելել է, որ բանակցություններին ԼՂՀ-ի մասնակցությունը հրամայական է, բայց այդ մասնակցությունը պետք է համընդգրկուն լինի: «Մենք պետք է միանանք ոչ թե առանձին փուլի, իսկ հետո Ադրբեջանի քմահաճույքով դուրս մնանք բանակցություններից: Մենք պետք է բանակցություններին մասնակցենք սկզբից մինչեւ վերջ, այսինքն կարծիքների փոխանակմանը, փաստաթղթերի վրա աշխատանքին, նման բնույթի համաձայնագրերի կնքմանը եւ դրանց իրականացմանը: Այդ 4 փուլին Լեռնային Ղարաբաղը պետք է մասնակցի սկզբից մինչեւ վերջ», - ամփոփել է Դաբիթ Բաբայանը:
Հիշեցնենք, որ ԵԱՀԿ-ի Մինսկի խմբի ռուսաստանցի համանախագահ Իգոր Պոպովը NEWS.am-ի թղթակցին հայտնել էր, որ Լեռնային Ղարաբաղը պետք է վերադառնա բանակցությունների սեղանի շուրջ: «Իրոք, այս փուլում ղարաբաղցիները բանակցություններին ձեւականորեն չեն մասնակցում: Սակայն այդ թեմային նեղ ուշադրություն է դարձվում համանախագահների հանդիպումներին եւ Հայաստանում, եւ Ադրբեջանում եւ հենց Լեռնային Ղարաբաղում: Ենթադրում եմ, թե որոշակի փուլում, օրինակ` շրջանակային պայմանավորվածության ձեռք բերումից հետո, ղարաբաղցիները պետք է վերադառնան բանակցությունների սեղանի շուրջ: Չէ որ խոսքն այն մարդկանց մասին է, որոնք ապրում են եւ ապրելու են այնտեղ», - հայտնել է Պոպովը: