Ռազմավարական մշակումների կենտրոնի (ՌՄԿ) նախագահ, ՌԴ նախագահին կից տնտեսական խորհրդի փոխնախագահ, ֆինանսների նախկին նախարար Ալեքսեյ Կուդրինը Ռուսաստանում առկա տնտեսական մոդելի պարագայում տնտեսական աճի հեռանկարներ չի տեսնում:
«Կարելի է ասել, թե հատակը անցել ենք, մենք ամենայն հավանականությամբ մոտ ենք այդ բնորոշմանը: Բայց, ցավոք սրտի, քանի որ տնտեսության հին մոդել է մշակված, նորը դեռեւս չի ձեւավորվել, նույնիսկ հատակն անցնելով, մենք կմնանք այդ հատակում»,— ասել է պարոն Կուդրինը «Շաբաթվա լուրեր» հեռուստահաղորդմանը տված հարցազրույցում:
Նա հայտնել է, որ այսօր Ռուսաստանի տնտեսության համար գլխավորը տնտեսական աճն է: «Մենք ձգձգում ենք կարեւոր բարեփոխումները: Դա պատճառ կդառնա տնտեսական աճի սկզբի ձգձգման»,— նշել է Ալեքսեյ Կուդրինը: Միաժամանակ նա համարում է, որ անհրաժեշտ է անցնել կայուն աճի: «Ոչ թե մեկ-երկու տարով. դա կնշանակի հերթական պղպջակը փչել: Մենք որոշ աշխուժացում կունենանք, իսկ հետո նորից անկում»,— ասել է նա:
Ալեքսեյ Կուդրինը նաեւ առաջարկել է աստիճանաբար մեծացնել Ռուսաստանում եւ տղամարդկանց, եւ կանանց համար կենսաթոշակային տարիքը մինչեւ միասնական մակարդակ` 63 տարի: Այժմ տղամարդկանց թոշակի անցնելու տարիքը 60 տարեկանն է, իսկ կանանց համար` 55-ը: «Երբ ասում եմ` կենսաթոշակային տարիք, խոսքը, ի թիվս այլ բաների, ռուսաստանյան տնտեսությունում հասունացած մի քանի խնդիր լուծելու մասին է, այդ թվում` բարձր թոշակի պահպանման կամ թոշակի բարձրացման նրանց համար, ովքեր արդեն թոշակառու են»,- ասել է Կուդրինը, հայտնում է «Կոմերսանտը»:
Ավելի վաղ Ռուսաստանի նախագահ Վլադիմիր Պուտինը, ելույթ ունենալով АСЕАН գործարար գագաթնաժողովի մասնակիցների առաջ, հայտնել էր, որ ճգնաժամը կարելի է հաղթահարված համարել 2015-ին: