Ներկա իրողությունը թելադրում է, որ Լեռնային Ղարաբաղի Հանրապետությունը պետք է հնարավորինս շուտ վերադառնա հակամարտության կարգավորման բանակցությունների գործընթացին: Այս մասին NEWS.am -ի թղթակցի հետ զրույցում ասել է ԼՂՀ Ազգային ժողովի պատգամավոր «Ժողովրդավարություն» խմբակցության անդամ Վարդգես Բաղրյանը:
Անդրադառնալով ԵԱՀԿ Մինսկի խմբի ռուսաստանցի համանախագահող Իգոր Պոպովի այն հայտարարությանը, որ Լեռնային Ղարաբաղը պետք է անպայման վերադառնա բանակցային սեղանի մոտ, պատգամավորը հիշեցրել է, որ ԵԱՀԿ Մինսկի խմբի համանախագահները վաղուց ունեին նման տեսակետ: «Մենք ամենաբարձր մակարդակներում բազմիցս նշել ենք, որ առանց ԼՂՀ իշխանությունների ու ժողովրդի կամքի այդ խնդիրը բնականաբար երբեք չի կարող լուծում ունենալ»: Միանշանակ է, շեշտեց պատգամավորը, որ ղարաբաղյան կողմը պետք է պարտադիր մասնակցի բանակցություններին, ընդ որում հնարավորինս շուտ, քանի որ դա այլընտրանք չունի: «Սա իհարկե չի նշանակում, որ մենք չենք վստահում Հայաստանին: Հայաստանը հակամարտության կողմ չէ: Հակամարտության կողմերը Ղարաբաղն ու Ադրբեջաննա են »,- փաստեց Վարդգես Բաղրյանը:
Վիեննայում ԵԱՀԿ Մինսկի խմբի համանախագահների կողմից կազմակերպված՝ Հայաստանի ու Ադրբեջանի նախագահների հանդիպման ժամանակ, շարունակեց պատգամավորը, նշվել է 1994-ին հաստատված հրադադարի ռեժիմը պահպանելու անհրաժեշտությունը: «1994-ի փաստաթղթում կա նաեւ Ղարաբաղի ներկայացուցչի ստորագրությունը: Այնպես որ իրականությունը թելադրում է, որ Լեռնային Ղարաբաղի Հանրապետությունը պետք է հնարավորինս շուտ վերադառնա բանակցային գործընթացին, եթե Ադրբեջանն ու ԵԱՀԿ Մինսկի խմբի համանախագահները իրոք ուզում են կարգավորել այս խնդիրը»,- ամփոփեց Վարդգես Բաղրյանը: