Հայաստանի ԱԻՆ-ում, այսօր՝ մայիսի 23-ին, ժամը 01.13-ին ահազանգ է ստացվել այն մասին, որ Շիրակի մարզի Գյումրի քաղաքի Երեւանյան խճուղում «Ֆորդ տրանզիտ» մարդատար միկրոավտոբուսը դուրս է եկել ճանապարհի երթեւեկելի մասից եւ հարվածել սյանը, կան տուժածներ. անհրաժեշտ է օգնություն:
Դեպքի վայր է մեկնել մեկ մարտական հաշվարկ:
Դեռեւս չբացահայտված հանգամանքներում «Ֆորդ տրանզիտ» մակնիշի 20 SU 334 պետհամարանիշով մարդատար ավտոմեքենան դուրս է եկել ճանապարհի երթեւեկելի մասից եւ հարվածել սյանը, ինչի հետեւանքով վարորդ 27-ամյա Ա. Դ.-ն, ուղեւորներ 43-ամյա Ա. Խ.-ն, 39-ամյա Ա. Ս.-ն, 39-ամյա Ս. Հ.-ն, 56-ամյա Ա. Խ.-ն, 28-ամյա Է. Հ.-ն, 37-ամյա Ա. եւ 32-ամյա Ա. Մ.-երը եւ 56-ամյա Տ. Խ.-ն տեղափոխվել են Գյումրի քաղաքի ԲԿ, վերջինս հոսպիտալացման ճանապարհին մահացել է:
Հրշեջ-փրկարարներն արգելափակումից դուրս են բերել 2 քաղաքացու, մոտեցրել են շտապօգնության ավտոմեքենային եւ իրականացրել ճանապարհի լվացման աշխատանքներ:
Բժիշկները Ա. Խ.-ն, Ա. Խ.-ի, Է. Հ.-ն, եւ Ա. Մ.-ի առողջական վիճակները գնահատել են ծայրահեղ ծանր, իսկ մյուսներինը՝ ծանր:
